Qazaqstanda ótken respýblikalyq referendýmnyń ótý barysyn halyqaralyq baqylaýshylar da qadaǵalap jatyr. Solardyń biri - Albaniia Respýblikasynyń Memlekettik sailaý komissary Ilirdjan Chelibashi. Ol Qazaqstanǵa Ortalyq sailaý komissiiasynyń shaqyrýymen kelgen, dep habarlaidy Dalanews.kz.
Sheteldik delegatsiia Astana qalasyndaǵy birneshe daýys berý ýchaskesinde boldy. Baqylaýshylar barǵan nysandardyń biri - Astana qalasy ákimdiginiń «№119 jalpy bilim beretin mektebi» kommýnaldyq memlekettik mekemesinde ornalasqan referendým ýchaskesi.
Ilirdjan Chelibashi bul onyń Qazaqstanǵa alǵash ret kelýi ekenin aitty.
«Men Albaniia Respýblikasynyń Memlekettik sailaý komissary bolyp qyzmet atqaramyn. Qazaqstanǵa Ortalyq sailaý komissiiasynyń shaqyrýymen keldik. Bul - meniń de, bizdiń delegatsiianyń da Qazaqstanǵa alǵashqy sapary», - dedi ol.
Halyqaralyq baqylaýshynyń aitýynsha, referendým barysynda kórgen daiyndyq jumystary jaqsy áser qaldyrǵan.
«Biz birneshe ýchaskede boldyq. Daýys berý protsesiniń qalai ótip jatqanyn kórdik. Komissiia múshelerimen sóilestik, daýys berý tártibi týraly suradyq. Barlyǵy túsinikti túrde uiymdastyrylǵan. Qazirgi kórip otyrǵanymyz boiynsha, daiyndyq jaqsy deńgeide», - dedi Chelibashi.
Onyń sózinshe, referendýmnyń naqty baǵasy daýys berý aiaqtalǵannan keiin ǵana beriledi.
«Qorytyndyny kún sońynda ǵana aitýǵa bolady. Biz áli birneshe ýchaskege baramyz. Biraq qazirgi áserimiz jaqsy, bári tynysh ári retimen ótip jatyr», - dedi halyqaralyq baqylaýshy.
Albaniialyq komissar referendýmdy demokratiialyq talaptardy nyǵaitýǵa baǵyttalǵan qadam dep baǵalaýǵa bolatynyn aitty.
