Kóptegen talqylaýlardan keiin qosymsha qun salyǵy (QQS) boiynsha túzetýler men ózgerister engizilgen Salyq kodeksiniń jobasy jariialandy. Oǵan sáikes, QQS 12-den 16%-ǵa artatyn, al QQS tóleýshini esepke qoiý úshin shekti kólem 20 myń AEK-ten 3 800 AEK-ke deiin tómendeitin boldy. Ishindegi, eń jaǵymdy jańalyq, BAQ pen agroónerkásip keshenderiniń QQS tóleýden bosatylýy, dep habarlaidy Dalanews.kz.
Salyq kodeksiniń jobasynda usynylǵan tyń dúnieler:
- QQS tóleýshini tirkep, esepke qoiý úshin shekti deńgei 20 myń AEK-ten 3800 AEK-ke deiin tómendetiledi (2025 jyly - 14 941 600 teńge);
- QQS mólsherlemesi 12-den 16%-ǵa deiin kóteriledi;
- buqaralyq aqparat quraldary men agroónerkásiptik keshen sýbektileri QQS-tan bosatylady;
- tómendetilgen 10% deńgeiindegi QQS mólsherleme bes salada belgilenedi: densaýlyq saqtaý (farmindýstriia,meditsinalyq qyzmetter, veterinariia) salasyndaǵy qyzmetter; IT; týrizm; kreativti indýstriia; áleýmettik mańyzy bar azyq-túlik taýarlary úshin.
Ońtailandyrylǵan deklaratsiia negizinde arnaiy salyq rejimi JK jáne QR rezidenti-zańdy tulǵalaryna (erekshelikter bar) mynadai sharttarǵa sáikes qoldanylady:
- bir jyldaǵy tabysy 600 myń AEK-ten (2 359 200 000 teńge) aspasa;
- osy rejimdi qoldaný maqsatynda QR Úkimeti aiqyndaǵan jeke tulǵalarǵa (JK bolyp tabylmaityn) taýarlardy, jumystar men kórsetiletin qyzmetterdi ótkizý jónindegi qyzmet túrlerin ǵana júzege asyrsa.
Aita ketsek, qańtar aiynyń sońynda Úkimet kútpegen jerden QQS mólsherin ósirý máselesine qaita oraldy. Zań jobasyna engiziletin túzetýler men ózgerister bir ai ishinde apyr-topyr ázirlenip, Májiliske de usynyldy. Qazir bul zań jobasy áli Májilis qaraýynda ekenin basa aita ketelik. Ulttyq ekonomika ministri Serik Jumanǵarin bul baǵytta óz qyzmetkerleri jeltoqsan aiynynyń sońynan bastap demalyssyz jumys istegenin de basa atap ótti. Birinshi ret Úkimet QQS-ty ósirýdi 2023 jyldyń kúzinde qozǵaǵan. 2024 jyldyń aqpanynda Toqaev alty ailyq talqylaýdan keiin bul máseleni orta joldan toqtatyp, betin jyly jaýyp qoiǵan edi. Al biyl QQS mólsherlemesin birden 20 paiyzǵa kóterý usynylǵan. Buǵan biznes qaýymdastyq narazylyq bildirip, údere kóterildi. Bul rette petitsiia da jariialandy. Odan keiin 16 paiyz týraly aityla bastady. Sol sebepti Memleket basshysy differentsialdy QQS mólsherlemesin qarastyrýdy usynǵan bolatyn.
