كوپتەگەن تالقىلاۋلاردان كەيىن قوسىمشا قۇن سالىعى (ققس) بويىنشا تۇزەتۋلەر مەن وزگەرىستەر ەنگىزىلگەن سالىق كودەكسىنىڭ جوباسى جاريالاندى. وعان سايكەس، ققس 12-دەن 16%-عا ارتاتىن، ال ققس تولەۋشىنى ەسەپكە قويۋ ءۇشىن شەكتى كولەم 20 مىڭ اەك-تەن 3 800 اەك-كە دەيىن تومەندەيتىن بولدى. ىشىندەگى، ەڭ جاعىمدى جاڭالىق، ب ا ق پەن اگروونەركاسىپ كەشەندەرىنىڭ ققس تولەۋدەن بوساتىلۋى، دەپ حابارلايدى Dalanews.kz.
سالىق كودەكسىنىڭ جوباسىندا ۇسىنىلعان تىڭ دۇنيەلەر:
- ققس تولەۋشىنى تىركەپ، ەسەپكە قويۋ ءۇشىن شەكتى دەڭگەي 20 مىڭ اەك-تەن 3800 اەك-كە دەيىن تومەندەتىلەدى (2025 جىلى - 14 941 600 تەڭگە)؛
- ققس مولشەرلەمەسى 12-دەن 16%-عا دەيىن كوتەرىلەدى؛
- بۇقارالىق اقپارات قۇرالدارى مەن اگروونەركاسىپتىك كەشەن سۋبەكتىلەرى ققس-تان بوساتىلادى؛
- تومەندەتىلگەن 10% دەڭگەيىندەگى ققس مولشەرلەمە بەس سالادا بەلگىلەنەدى: دەنساۋلىق ساقتاۋ (فارميندۋستريا،مەديسينالىق قىزمەتتەر، ۆەتەريناريا) سالاسىنداعى قىزمەتتەر؛ IT؛ تۋريزم؛ كرەاتيۆتى يندۋستريا؛ الەۋمەتتىك ماڭىزى بار ازىق-تۇلىك تاۋارلارى ءۇشىن.
وڭتايلاندىرىلعان دەكلاراسيا نەگىزىندە ارنايى سالىق رەجيمى جك جانە ق ر رەزيدەنتءى-زاڭدى تۇلعالارىنا (ەرەكشەلىكتەر بار) مىناداي شارتتارعا سايكەس قولدانىلادى:
- ءبىر جىلداعى تابىسى 600 مىڭ اەك-تەن (2 359 200 000 تەڭگە) اسپاسا؛
- وسى رەجيمدى قولدانۋ ماقساتىندا ق ر ۇكىمەتى ايقىنداعان جەكە تۇلعالارعا (جك بولىپ تابىلمايتىن) تاۋارلاردى، جۇمىستار مەن كورسەتىلەتىن قىزمەتتەردى وتكىزۋ جونىندەگى قىزمەت تۇرلەرىن عانا جۇزەگە اسىرسا.
ايتا كەتسەك، قاڭتار ايىنىڭ سوڭىندا ۇكىمەت كۇتپەگەن جەردەن ققس مولشەرىن ءوسىرۋ ماسەلەسىنە قايتا ورالدى. زاڭ جوباسىنا ەنگىزىلەتىن تۇزەتۋلەر مەن وزگەرىستەر ءبىر اي ىشىندە اپىر-توپىر ازىرلەنىپ، ماجىلىسكە دە ۇسىنىلدى. ءقازىر بۇل زاڭ جوباسى ءالى ءماجىلىس قاراۋىندا ەكەنىن باسا ايتا كەتەلىك. ۇلتتىق ەكونوميكا ءمينيسترى سەرىك جۇمانعارين بۇل باعىتتا ءوز قىزمەتكەرلەرى جەلتوقسان ايىنىنىڭ سوڭىنان باستاپ دەمالىسسىز جۇمىس ىستەگەنىن دە باسا اتاپ ءوتتى. ءبىرىنشى رەت ۇكىمەت ققس-تى ءوسىرۋدى 2023 جىلدىڭ كۇزىندە قوزعاعان. 2024 جىلدىڭ اقپانىندا توقايەۆ التى ايلىق تالقىلاۋدان كەيىن بۇل ماسەلەنى ورتا جولدان توقتاتىپ، بەتىن جىلى جاۋىپ قويعان ەدى. ال بيىل ققس مولشەرلەمەسىن بىردەن 20 پايىزعا كوتەرۋ ۇسىنىلعان. بۇعان بيزنەس قاۋىمداستىق نارازىلىق ءبىلدىرىپ، ۇدەرە كوتەرىلدى. بۇل رەتتە پەتيسيا دا جاريالاندى. ودان كەيىن 16 پايىز تۋرالى ايتىلا باستادى. سول سەبەپتى مەملەكەت باسشىسى ديففەرەنسيالدى ققس مولشەرلەمەسىن قاراستىرۋدى ۇسىنعان بولاتىن.
