Qazaqstanda qyz alyp qashýǵa qatysty jaza kúsheıtildi, dep habarlaıdy Dalanews.kz.

16 qyrkúıekten bastap Qylmystyq kodekske jańa 125-1-bap ("Neke qıýǵa májbúrleý") engizildi. Bul norma boıynsha adamdy erkinen tys nekege turǵyzý nemese birge turý maqsatynda urlaǵany úshin qylmystyq jaýapkershilik qarastyrylady.

Endi mundaı áreketter aýyr qylmys retinde saralanady jáne kináliler jeti jylǵa deıin bas bostandyǵynan aıyrylýy múmkin. Al aýyr jaǵdaılarda jaza 10 jylǵa deıin ulǵaıady. Buryn jábirlenýshini óz erkimen jibergen jaǵdaıda qylmystyq jaýapkershilikten bosatýǵa múmkindik beretin norma alyp tastaldy. Endi jábirlenýshini bosatqanyna qaramastan jaza taǵaıyndalady.

"Jańa ózgerister kúshine engen sátten bastap ishki ister organdarynyń bólinisteri Qaraǵandy, Mańǵystaý, Jambyl, Túrkistan oblystarynda jáne Shymkent qalasynda neke qıýǵa májbúrleý derekteri boıynsha jeti qylmystyq is qozǵady. Júrgizilgen sharalar nátıjesinde 15 adam ustaldy. Árbir is boıynsha sotaldy tergeý júrgizilip, qylmystardyń barlyq mán-jaıy anyqtalyp jatyr. İshki ister mınıstrligi azamattardy zorlyq-zombylyq pen nekege májbúrleý jaǵdaılaryna beıjaı qaramaýǵa shaqyrady. Mundaı derekter týraly aqparatyńyz bolsa, dereý 102 nómiri arqyly polısıaǵa habarlasyńyz", - dedi İİM ókili.