İshki ister mınıstrligi esirtki quraldarynyń zańsyz aınalymymen baılanysty qylmystardy anyqtaý jáne toqtatý boıynsha belsendi jumysyn jalǵastyrýda, dep habarlaıdy Dalanews.kz Polisia.kz – ǵa silteme jasap.
Erekshe nazar jasóspirimder men jastar arasyndaǵy, sonyń ishinde kámeletke tolmaǵandardyń esirtki ortasyna tartylýyna jol bermeý sharalaryna aýdarylyp otyr. Shamamen 17 myńǵa jýyq esirtkige qarsy is-shara ótkizildi, jasóspirimder men jastardy qamtý sany 2 mıllıon adamdy qurady.
Alaıda qabyldanyp jatqan sharalarǵa qaramastan, kámeletke tolmaǵandardyń esirtki quraldaryn taratqany úshin ustalý faktileriniń ósý úrdisi saqtalyp otyr.
Máselen, Abaı oblysynda polısıa qyzmetkerleri kolejdiń birinshi kýrsynda oqıtyn kámeletke tolmaǵan qyzdy asa iri kólemde psıhotroptyq zattardy zańsyz saqtaǵany úshin ustady. Tintý barysynda 16 gr sıntetıkalyq esirtki tárkilendi.
Shyǵys Qazaqstan oblysynda esirtki satqan taǵy bir kámeletke tolmaǵan jasóspirim ustaldy. Ol Almaty qalasynda turyp, Óskemenge kelip, bir aı boıy tyıym salynǵan zattardy satýmen aınalysatyn ınternet-dúkenniń kýreri-qoımashysy bolyp jumys istegen. Ustaý barysynda odan α-PVP tobyna jatatyn 3 gr sıntetıkalyq esirtki tárkilendi.
«Búgingi tańda respýblıka boıynsha esirtkiniń zańsyz aınalymyna tartylǵan 60-tan astam kámeletke tolmaǵan jasóspirim ustaldy. İshki ister mınıstrligi ata-analardy balalarynyń qarym-qatynas ortasyna muqıat nazar aýdarýǵa, sondaı-aq jasóspirimderge “jeńil tabys” nemese “qashyqtyqtan jumys” usynýy múmkin kúmándi áleýmettik jeliler men messendjerlerdi tekserýge shaqyrady.
İİM eske salady: esirtki jáne psıhotroptyq zattardy satý úshin ómir boıyna bas bostandyǵynan aıyrýǵa deıingi qylmystyq jaýapkershilik kózdelgen; aldaǵy ýaqytta kámeletke tolmaǵannyń esirtkiniń zańsyz aınalymyna ata-anasynyń kinási nemese tıisti baqylaýdyń bolmaýynan tartylǵany anyqtalsa, ata-analyq mindetterin tıisinshe oryndamaǵany úshin jaýapkershilikti qatańdatý josparlanýda», — delingen habarlamada.
