Stadion tribýnalarynda jelbiregen jalaýlar sap-sary dariiadai teńselip, jasyl alań jiegi teńizdei tolqydy. Al kún batyp, qas qaraiǵan soń, jankúierlerdiń bári qalta telefondarynyń shamyn jaǵyp, ainala ottai mazdap, jarqyrap turdy.
Bul óte áserli kórinis boldy. Munyń bári jankúierlerdiń "Qairattyń" oiynyna riza bolyp, qýanyshtaryn bildirgenderi edi. Bul keshte bári de tamasha boldy. Stadion toly jankúier. Deńgeii joǵary doda. Taktikalyq turǵydaǵy saýatty oiyn. Tamasha jeńis. Eki goldy da ózimizdiń órenderimiz soqty. Qýanyshymyzda shek joq. Jankúierler de qiqý salyp, aiqaiǵa basyp jatyr...
Tek osy oiynǵa arnalyp shyǵarylǵan anyqtamalyq-baǵdarlamalyq juqa kitapsha ("programka") kóńilge kirbiń túsirdi.
Jo-oq, mazmunynda, kórkemdelýinde, sapasynda min joq. Syrtqy (birinshi jáne sońǵy) betterindegi aqparattar aǵylshyn jáne qazaq tilderinde jazylǵan. Al ishinde áýeli orys tiline oryn berilgen. Sodan soń memlekettik tildegi aqparattar ornalastyrylǵan. Sońǵy betterde osy aqparattardyń aǵylshyn tilindegi nusqasy baiandalǵan.
Bul tyrnaq astynan kir izdeý emes. Bul "aitylmasa sóz óledi" degendei, ana tilimizdiń qazaqtyń "Qairatyndaǵy" búgingi jaǵdaiyna atústi toqtalyp ótý. Jasyryn emes, "Qairat" fýtbol klýby qazir qazaqsha "sairap" turǵan joq. Orysshasy basym.
Bul sózderimzge klýbtyń resmi saityna kirip, kóz jetkizýlerińizge de bolady. Oryssha nusqasynda bári de qamtylǵan. Ári jedel, der kezinde baiandalyp otyrady. Al qazaqshasy onyń shańyna da ilese almaidy. Tipti biyl (2015 jyly) eki-aq aqparat berilgendei...
Kezinde, iaǵni Keńes Odaǵy dáýirinde ár ulttyń (odaqtas respýblikanyń) súiikti komandasy boldy. Qazaq "Qairat" dep, ózbek "Pahtakor" dep, armian "Ararat" dep, ýkrain "Dinamo" (Kiev) dep, al orys halqy "Spartak" (Máskeý) dep ah urdy. Bulardyń bári de óz elderiniń halyqtyq, jalpyulttyq komandasy boldy desek te jarasar.
Sol qazaqtyń "Qairaty" ana tilinde sóilese deimiz de. Sonda ǵana "qazaqtyń "Qairaty" degen atqa, tipti brendke laiyq bolmai ma?!
Nurǵazy SASAEV
