Politseilerdi atyp óltirgen lańkestiń jubaiy elden keshirim surady
Qazir kúdiktiniń áieli jeke basynyń qaýipsizdigi úshin qala syrtynda páter jaldap turyp jatyr. Kópshiliktiń kózine túsýdi qalamaityn ol telearna tilshilerine suhbat berýge kelisken. Onyń aitýynsha, kúieýi ekeýi ótken aptada ǵana jaldamaly páterlerin ótkizip, ózi Baiqońyr qalasyna barǵan.
Al Rýslan Kúlikbaev «sheshilmegen sharýam bar» dep qalada qalyp qoiypty. Jubaiy kúieýiniń politseilerge oq atyp, lań salǵanyn tek telearnadan «kórip-bildim» deidi.
– Baiqońyr qalasynda júrgende bolǵan oqiǵany estidim. Jańalyqtan kórdim. Olai bolady dep kim oilaǵan? Úidegiler jylap, anasy talyp, qatty qinaldy. Qansha degenmen joldasym ǵoi. Men odan mundaidy kútpegen edim, – deidi Aiaýlym Úmbetqulova.
Lańkespen 6 jyl bir shańyraq astynda turǵan Aiaýlym kúieýiniń buryn-sońdy mundai qatygezdigin baiqamaǵan. Joldasynyń kimdermen aralasqanyn da aita almai otyr. Óitkeni, Rýslan áielin eshqashan toi-tomalaqqa aparyp, týystarymen qatynastyrmaǵan. Esesine, ylǵi hidjap kiip, namazǵa jyǵylýǵa úgittepti.
– Túrmeden shyqqanda maǵan «paranja ki, dinge qosyl» dedi. Men qarsy boldym. Menimen turǵyń kelmese, turmai-aq qoi, oranyp, jaýyp kiinbeimin dedim, – deidi jubaiy.
Aiaýlymnyń aitýynsha, Rýslannyń 2-3 kúndep úige qonbai ketetin ádeti bolǵan. Biraq qaida baratynyn «jasyryp aitpaityn» deidi. Al sońǵy ýaqytta júrisi sýyt, minez-qulqy ózgere bastaǵan.
– Sońǵy kezderi asyǵys boldy. Bir orynda otyrmaityn bir jaqqa asyǵyp turtyn. Sondai tirlikterin baiqadym. Túrmede otyrǵanda qiyndyq kórip, politseilerge óshtesken shyǵar dep oilaimyn. Ol bes ýaqyt namaz oqyp júrip mynadai tirlikke qalai bardy? Eger shynaiy musylman bolsa, namaz oqi turyp bireýdi óltirmek túgili, jerde jatqan jándikti óltirýge qudaidan qorqady ǵoi. Qalai myna iske barǵanyn men de túsinbei qaldym. Senbei turmyn áli kúnge, – deidi Aiaýlym.
Alty birdei jazyqsyz jandy atyp óltirgen kúieýi úshin Aiaýlym keshirim surap otyr.
– Ol kisilerge aitarym – sabyr saqtasyn. Qaiǵysyna ortaqpyn. Qoinymda jatqan kúieýimdi osyndai qanisher adam bolady dep oilamappyn. Ózińiz de janyńyzda jatqan adamdy jamandyqqa qimaisyz ǵoi. Keshirińizder. Qarǵamańyzdar. Meniń de balam bar. Eki bala baǵyp otyrǵan anamyn. Eki balanyń bolashaǵy úshin qarǵamańyzdar. Bizdiń eshqandai kinámiz joq, – dedi.
Eki kúnnen beri kóz jasy qurǵamaǵan kelinshek «endigi kórmegenim Rýslan bolsyn» dep otyr. Sebebi, balalarynyń bolashaǵyna balta shapqan lańkespen ajyrasýǵa bel býǵan.
– Eki balamdy asyrap ósirem. Rýslanmen zańdy túrde ajyrasamyn, boldy! Balalarymnyń bolashaǵyna kedergi bolmasyn deimin. Solardyń atyna kir kelmesin, ákesi úshin olar keiin jaqsy jerde jumys istei almai ma dep ýaiymdaimyn.
Sary ýaiymǵa salynyp, ishkeni – iriń, jegeni – jelim bolǵan kelinshekti politseiler jeti saǵat boiy tergegen. Aiaýlym tártip saqshylaryna bar bilgenin jasyrmai jaiyp salypty. Osy suraq-jaýaptan keiin lańkestiń sońǵy turǵan meken-jaiy anyqtalyp, kók bazar mańynda arnaiy operatsiia júrgizilgen.
Dias Nuraqyn
