Kievke ketken qoǵam qairatkeri ári azamattyq belsendi Ermek Narymbaevqa izdeý jariialandy. Bul týraly Almaty qalasy qylmystyq-atqarý júiesi departamentiniń basshysy Manas Tuiaqbaevqa silteme jasap informburo.kz qazaqstandyq saity habarlady.
Tuiaqbaevtyń aitýynsha, qazir «bastapqy izdestirý is-sharalary» júrgizilip jatyr, Narymbaevtyń ketip qalǵany rastalatyn bolsa, onda «tiisti sharalar qabyldanatyn bolady». Narymbaev elden ketip qalǵanyn rastap qana qoimai, tipti ol týraly Kievte baspasóz máslihatyn ótkizip úlgergen edi.
«Baqylaý qyzmeti bólimine tirkeýge turǵyzǵan ýaqytta onymen túsindirý jumystary júrgizildi, biraq ol ashýlanyp, sot júktegen jaýapkershilikterdi durys qabyldaǵan joq. Ol jazanyń negizgi merzimi tolyq ótelmeiinshe nemese baqylaý ýaqyty aiaqtalmaiynsha, Qazaqstan aýmaǵynan shyǵýǵa tyiym salynatyny týraly jazbasha eskertildi», - dedi departament ókili.
Ermek Narymbaevtyń Ýkrainaǵa ketip qalǵany 14 shildede Aidos Sadyqovtyń Facebook'te Narymbaevpen Kievte birge túsken sýretin jariialaǵan ýaqytta belgili boldy. Narymbaevpen birge Kievke taǵy bir belsendi Móldir Ádilova barǵan. Ádilova biyl 21 mamyrda «jer máselesi» boiynsha miting kezinde ustalǵandardyń biri. Narymbaev pen Ádilova Kievte baspasóz máslihatyn birge ótkizip, Qazaqstanda qýdalaýǵa ushyraǵandaryn jáne saiasi baspana suraityndaryn málimdedi.
Ermek Narymbaev 2015 jyldyń aiaǵynda Murat Telibekovtyń «Veter s ýlitsy» kitabynan Facebook'tegi paraqshasynda úzindi jariialaǵany úshin ultaralyq arazdyq týǵyzdy degen aiyppen sottaldy. Túrme merzimi keiin erkindigin shekteý jazasyna almastyrylǵan edi.
