تۇياقبايەۆتىڭ ايتۋىنشا، ءقازىر «باستاپقى ىزدەستىرۋ ءىس-شارالارى» جۇرگىزىلىپ جاتىر، نارىمبايەۆتىڭ كەتىپ قالعانى راستالاتىن بولسا، وندا «ءتيىستى شارالار قابىلداناتىن بولادى». نارىمبايەۆ ەلدەن كەتىپ قالعانىن راستاپ قانا قويماي، ءتىپتى ول تۋرالى كييەۆتە باسپا ءسوز ءماسليحاتىن وتكىزىپ ۇلگەرگەن ەدى.

«باقىلاۋ قىزمەتى بولىمىنە تىركەۋگە تۇرعىزعان ۋاقىتتا ونىمەن ءتۇسىندىرۋ جۇمىستارى جۇرگىزىلدى، ءبىراق ول اشۋلانىپ، سوت جۇكتەگەن جاۋاپكەرشىلىكتەردى دۇرىس قابىلداعان جوق. ول جازانىڭ نەگىزگى مەرزىمى تولىق وتەلمەيىنشە نەمەسە باقىلاۋ ۋاقىتى اياقتالمايىنشا، قازاقستان اۋماعىنان شىعۋعا تىيىم سالىناتىنى تۋرالى جازباشا ەسكەرتىلدى»، - دەدى دەپارتامەنت وكىلى.

ەرمەك نارىمبايەۆتىڭ ۋكرايناعا كەتىپ قالعانى 14 شىلدەدە ايدوس سادىقوۆتىڭ Facebook'تە نارىمبايەۆپەن كييەۆتە بىرگە تۇسكەن سۋرەتىن جاريالاعان ۋاقىتتا بەلگىلى بولدى. نارىمبايەۆپەن بىرگە كييەۆكە تاعى ءبىر بەلسەندى ءمولدىر ءادىلوۆا بارعان. ءادىلوۆا بيىل 21 مامىردا «جەر ماسەلەسى» بويىنشا ميتينگ كەزىندە ۇستالعانداردىڭ ءبىرى. نارىمبايەۆ پەن ءادىلوۆا كييەۆتە باسپا ءسوز ءماسليحاتىن بىرگە وتكىزىپ، قازاقستاندا قۋدالاۋعا ۇشىراعاندارىن جانە ساياسي باسپانا سۇرايتىندارىن مالىمدەدى.

ەرمەك نارىمبايەۆ 2015 جىلدىڭ اياعىندا مۇرات تەلىبەكوۆتىڭ «ۆەتەر س ۋليسى» كىتابىنان Facebook'تەگى پاراقشاسىندا ءۇزىندى جاريالاعانى ءۇشىن ۇلتارالىق ارازدىق تۋعىزدى دەگەن ايىپپەن سوتتالدى. تۇرمە مەرزىمى كەيىن ەركىندىگىن شەكتەۋ جازاسىنا الماستىرىلعان ەدى.