Otyrar týristik ortalyqqa ainalady
Qazaqstan Respýblikasynyń Prezidenti Nursultan Ábishulynyń «Ult Jospary 100 naqty qadam» Joldaýynyń 86,87 qadamdarynda týrizmdi damytý men klasterler qurý, Qazaqstandy álemge sonyń ishinde týristerge tanytý men jarnamalaý maqsatynda naqty jáne dáleldi túrde máseleler kóterilgen jáne tapsyrmalar berilgen. Tapsyrmaǵa sáikes Otyrar aýdanynyń ákimi Erlan Aitahanov aýdanda etnomádeni aýyldyń boi kóterip jatqanyn kezekti baspasóz máslihatynda habarlady: «Oblys ákimi Janseiit Túimebaev týrizm salasyn damytý arqyly qazynaǵa qosymsha qarjy túsirýge bolatynyn jii aityp keledi. Ótkende TÚRKSOI uiymy uiymdastyrǵan «Túrkistan – túrki áleminiń mádeni astanasy» jobasy aiasynda Otyrarǵa AQSh, Frantsiia, Túrkiia elderinen 50 týrist keldi. Biz olardy kútip alyp, Arystanbab sekildi tarihi kesenelerge apardyq. Degenmen, shynymdy aitsam, olar asa qyzyǵýshylyq tanyta qoimady. Sóitsek, olarǵa turmystyq salt-dástúrler, jergilikti mádeniet qyzyqtyraq eken. Sol kezde olar bizden Orta ǵasyrdaǵy qazaq halqy paidalanǵan buiymdardy surady. Dereý jergilikti qolóner sheberlerin, zergerlerdi shaqyrtyp, týristermen saýda-sattyq jasadyq. Ainaldyrǵan 3-4 saǵatta týristerden qazynaǵa 1100 eýro tústi. Sóitip, olar kiiz úidi, onyń ishindegi ulttyq jihazdardy, aspaptardy kórgileri keletinin aitty. Eń sońy bizge óz usynystaryn aitty. Nátijesinde etnoaýyl jobasy dúniege keldi, - dep keleshekte Otyrarda týrizm salasy qaryshtap damitynyna senim bildirdi.
Aita keteiik, Jospardyń 86 qadamynda aitylǵan «Uly Jibek jolyn qaita jańǵyrtý» atty klaster dál osy Ońtústik Qazaqstan oblysyna arnalǵan. Klaster 28 murajaidy, 8 teatrdy, 431 kitaphanany, klýb úlgisindegi 268 mekemeni, 5 kinoteatrdy, 39 mádeniet jáne demalys saiabaqtaryn, 2 tsirkti, haiýanattar baǵyn, bir kontsert uiymyn qamtidy. Tarihi-mádeni obektilerdiń qataryna mynalar kiredi: ejelgi Túrkistan men «Áziret-Sultan» memlekettik tarihi-mádeni qoryq-murajaiynyń eskertkishteri, ortaǵasyrlyq Otyrar qalashyǵy men Otyrar dalasynyń arheologiialyq obektileri (IýNESKO-nyń aldyn ala tizimine engizilgen), Saýran arheologiialyq kesheni, Aqyrtas sarai kesheni, paleolitikalyq ýchaskeleri men geomorfologiiasy bar Qarataý memlekettik tabiǵi qoryǵy, IýNESKO-nyń aldyn ala tizimine engizilgen Arpa-Ózen petroglifteri, Qorqyt Ata memorialdyq kesheni jáne taǵy da basqalar.
Derekkóz: "Oinet" saity
