Arystyń baldai qaýyny
Óńir basshysynyń aitýynsha Arysta 2015-2017 jyldar aralyǵynda indýstrialandyrý baǵdarlamasy aiasyndaǵy bes joba maquldanyp, jalpy quny 51,6 milliard teńgege 130-dan astam jańa jumys ornyn quraityn tórt joba iske qosylǵan. Al, 2017-2019 jyldar ishinde indýstrialandyrý kartasy sheńberinde úsh jobany iske asyrý josparlanýda. Eger jospar oidaǵydai bolsa, taǵy júzdegen jumys oryndary ashylady.
Sonymen qatar, qala ákimi Elbasy Joldaýy negizinde júktelgen mindetterdi júzege asyrý boiynsha agrarlyq sektorda atqarylyp jatqan jumystarǵa toqtaldy. Biyl Arysta 900 gektar jerge tamshylatyp sýarý ádisi engizilip, josparlanǵan meje tolyǵymen oryndaldy. Qosymsha 2,0 gektar jerge jylyjai salyndy, jyl sońyna deiin taǵy 5,0 gektar jylyjai salý tapsyrmasy júzege asady. Básekege tótep berý úshin tek jazdygúni emes, qystygúni de halyqty balǵyn kókónistermen qamtamasyz etý mańyzdy. «Shardara dese balyq, Saryaǵash dese mineraldy sý kózińizge elesteidi. Arys dese tosylyp qalatyndaryńyz anyq. Biz osy olqylyqty retteý úshin qala brendine – qaýyndy laiyq dep taptyq. Almaty respýlbikaǵa aportymen tanymal bolsa, biz dámi til úiiretin qaýyn arqyly tanylsaq deimiz. Bul úshin aýyl sharýashylyǵymen ainalysatyndarǵa qoldan kelgenshe kómek kórsetýdemiz. Degenmen, bir qaýynmen shektelip qalýǵa bolmaidy. Esterińizde bolsa, Arystan shyqqan mineraldy sý KSRO tusynda búkil Odaqqa taraǵan. Biz osy zaýytty qaita jandandyryp, «Arys» brendti mineraldy sýsynyn qaita shyǵarýdy qolǵa aldyq», - dedi ákim.
