ءوڭىر باسشىسىنىڭ ايتۋىنشا ارىستا 2015-2017 جىلدار ارالىعىندا يندۋستريالاندىرۋ باعدارلاماسى اياسىنداعى بەس جوبا ماقۇلدانىپ، جالپى قۇنى 51،6 ميلليارد تەڭگەگە 130-دان استام جاڭا جۇمىس ورنىن قۇرايتىن ءتورت جوبا ىسكە قوسىلعان. ال، 2017-2019 جىلدار ىشىندە يندۋستريالاندىرۋ كارتاسى شەڭبەرىندە ءۇش جوبانى ىسكە اسىرۋ جوسپارلانۋدا. ەگەر جوسپار ويداعىداي بولسا، تاعى جۇزدەگەن جۇمىس ورىندارى اشىلادى.
سونىمەن قاتار، قالا اكىمى ەلباسى جولداۋى نەگىزىندە جۇكتەلگەن مىندەتتەردى جۇزەگە اسىرۋ بويىنشا اگرارلىق سەكتوردا اتقارىلىپ جاتقان جۇمىستارعا توقتالدى. بيىل ارىستا 900 گەكتار جەرگە تامشىلاتىپ سۋارۋ ءادىسى ەنگىزىلىپ، جوسپارلانعان مەجە تولىعىمەن ورىندالدى. قوسىمشا 2،0 گەكتار جەرگە جىلىجاي سالىندى، جىل سوڭىنا دەيىن تاعى 5،0 گەكتار جىلىجاي سالۋ تاپسىرماسى جۇزەگە اسادى. باسەكەگە توتەپ بەرۋ ءۇشىن تەك جازدىگۇنى ەمەس، قىستىگۇنى دە حالىقتى بالعىن كوكونىستەرمەن قامتاماسىز ەتۋ ماڭىزدى. «شاردارا دەسە بالىق، سارىاعاش دەسە مينەرالدى سۋ كوزىڭىزگە ەلەستەيدى. ارىس دەسە توسىلىپ قالاتىندارىڭىز انىق. ءبىز وسى ولقىلىقتى رەتتەۋ ءۇشىن قالا برەندىنە – قاۋىندى لايىق دەپ تاپتىق. الماتى رەسپۋلبيكاعا اپورتىمەن تانىمال بولسا، ءبىز ءدامى ءتىل ۇيىرەتىن قاۋىن ارقىلى تانىلساق دەيمىز. بۇل ءۇشىن اۋىل شارۋاشىلىعىمەن اينالىساتىندارعا قولدان كەلگەنشە كومەك كورسەتۋدەمىز. دەگەنمەن، ءبىر قاۋىنمەن شەكتەلىپ قالۋعا بولمايدى. ەستەرىڭىزدە بولسا، ارىستان شىققان مينەرالدى سۋ كسرو تۇسىندا بۇكىل وداققا تاراعان. ءبىز وسى زاۋىتتى قايتا جانداندىرىپ، «ارىس» برەندتى مينەرالدى سۋسىنىن قايتا شىعارۋدى قولعا الدىق»، - دەدى اكىم.
