Spıkerlerdiń aıtýynsha, jumys sapardyń basty maqsaty dúnıedegi aldyńǵy qatarly medısınasy damyǵan elderdiń biri sanalatyn Ońtústik Koreıa memleketiniń medısınalyq kómek kórsetý júıesiniń jumysymen tanysý. Brıfıńte óz oıymen bólisken Saryaǵash aýdandyq aýrýhanasynyń bas dárigeri, top jetekshisi Ibragım Tashev óńirden barǵan delegasıalar kompúterlik-aqparattyq júıeniń jumys tártibimen, medısıalyq saqtandyrý júıesiniń erekshelikterimen, ınsýlt alǵan naýkastarǵa kórsetiletin kómek, ınsýltan keıingi reabılıtasıa jumystaryn uıymdastyrý máselelerimen tanysqanyn atap ótti.
«Biz eń aldymen 3 aýrýhanadan turatyn SEM medısınalyq klınıkasynyń jumysymen tanysýdan bastadyq. Gospıtálda medısınanyń barlyq salalary boıynsha bólimsheler bar, jáne olar kásibı mamandarmen zamanaýı medısınalyq qural-jabdyqtarmen qamtamasyz etilgen. Sondaı-aq, zamanaýı talaptarǵa saı keletin emdeý keshenderi qataryna kiretin Adjý ýnıversıtettik klınıkasynyń jumysyn kórdik. Onda bar-joǵy 80 stýdent dáris alady. Klınıka ujymynyń aıtýynsha, bul úzdik medısınalyq mamandardy daıyndaýdyń kepili eken», - deıdi Ibragım Tashev.
[caption id="attachment_30422" align="aligncenter" width="800"]
Sýret avtory: Azat Dıdarbek[/caption]
Munymen qosa ońtústikqazaqstandyq 20 dáriger Kengıdo provınsıasynyń vıse-meri men densaýlyq saqtaý mınıstriniń qabyldaýynda boldy. Onda qos tarap provınsıa medısına salasynyń jetistikteri men medısınalyq saqtandyrý júıesiniń jumysy jaıly sóz qozǵaǵan.
Baspasóz konferensıasynda sóz alǵan Shardara aýdandyq emhanasynyń bas dárigeri Janar Ospanova medısınalyq saqtandyrý júıesin endirýde elý jyldyq tájirıbe bar Ońtústik Koreıanyń júıesin óńirimizde júzege asyrýǵa bolatynyn aıtty.
Arys aýdandyq ortalyq aýrýhanasynyń bas dárigeri Erǵalı Álimbaevtyń aıtýynsha, Ońtústik Koreıada Seýl ýnıversıtettik aýrýhanasynan basqa barlyq gospıtáldar tolyǵymen jekemenshik eken. Ondaǵy medısınalyq kómektiń barlyǵy, onyń ishinde jedel járdem qyzmeti de aqyly túrde kórsetiledi. Al, saqtandyrý qoryna azamattar óziniń 20 paıyz tabysyn ótkizip otyrady eken. Sol sebepten, klınıkalardyń jańa qural saımandarmen jabdyqtalyp, pasıentterge zamanaýı úlgide dıagnostıkalyq jáne emdik kómek kórsetýine múmkindik bar.
Jalpy sapar qorytyndysymen dárigerler oblysta halyq arasynda sanıtarlyq aǵartý jumystaryn jandandyrý, BMSK deńgeıin kóterý, aýdandyq aýrýhanalarda reabılıtasıa bólimshelerin ashý, ınsýlttiń aldyn alý jáne reabılıtasılyq kómekti jandandyrý jáne osy jumystarǵa qoǵamdyq uıymdar men ákimshilik qyzmetkerlerdi jumyldyrý boıynsha jumystardy damytý qajet dep túıgen.
Aıta keteıik, osy jyldyń sáýir aıynda Ońtústik Koreıa respýblıkasynyń bir top úzdik dárigerleri Shymkentte elimizdiń ár óńirinen kelgen medısına mamandaryna master-klasstar ótkizip, dáris oqyp, tájirıbelerimen bólisken edi. Onda Ońtústik Koreıanyń aldyńǵy qatarly 4 klınıkasymen yntymaqtastyqty arttyrý maqsatynda Ońtústik Qazaqstan oblysynyń densaýlyq saqtaý basqarmasy men Koreıa Respýblıkasy densaýlyq saqtaý ındýstrıasyn damytý ınstıtýty (KHIDI) arasynda túzilgen yntymaqtastyq memorandýmyna qol qoıylǵan bolatyn.
OQO ákiminiń baspasóz qyzmeti
