“Reihstagqa birinshi bolyp kirgen jaýyngerlerdiń arasynda jiyrma jasar leitenant Raqymjan Qoshqarbaev pen 19-ǵa endi tolǵan Grigorii Bolatov boldy. Sarbazdar qyzyl jalaýdy ózderimen birge ala kirgen edi. 150-shi diviziianyń jýrnalyndaǵy jazbada saǵat túski eki jarymǵa taman Qoshqarbaev pen Bolatov ǵimarattyń ortalyq jaǵyna ótip, kireberis jerge jeńis týyn ornatqany aitylǵan.
Bul Reihstagta eń alǵash jelbiregen qyzyl jalaýdyń biri-tuǵyn. Ǵimarattyń tumsyǵyndaǵy qyzyl tý jaýyngerlerge erekshe rýh berdi. 30 sáýir keshke taman 674-shi jáne 756-shy polktiń kúshteri qorǵanystaǵy Gitler áskeriniń kúl-parshasyn shyǵaryp, ishke endi”, – depti Resei Syrtqy ister ministrligi.
...
Muny ministrliktiń resmi kózqarasy dep qabyldaýǵa bolatyndai. Resmi paraqshada jaryq kóretin kontent ádette qatań súzgiden ótetini belgili.
Eń qyzyǵy Máskeý kúni búginge deiin Qoshqarbaevtyń erligin moiyndaýdan bas tartyp keldi. Resei sheneýnikteri Reihstagqa tý tikken qazaqty qalqada qaldyryp, bul taqyrypty qozǵaýdan jaltaryp júretin-di.
Reseiden taralatyn “Novaia gazetiniń” habarlaýynsha Qoshqarbaevtyń erligin laiyqty baǵalaǵan resmi biliktiń ókilderi biren-saran ǵana.
Kreml ideologtary bul ekeýine batyr degen ataqty kópsinip, erligin eskerýsiz qaldyrǵandy jón kórgen.
...
Qazir Pýtinniń pármenimen beriletin Qorǵanys ministrliginiń memnagradasynan Qoshqarbaevtyń qasyndaǵy Bolatov quralaqan qalǵan.
“Bul qalai?” dep shamyrqanǵan qaýymǵa komissiia músheleri: “Bolatov? Oǵan Keńes Odaǵynyń batyry ataǵyn berý artyq”, – dep short kesken. Bolatovqa batyr ataǵyn berýdi surap, Pýtinge deiin shaǵymdanǵan Resei tarihshylary Reihstagqa tý tikken qazaqty umyt qaldyrsa kerek. Ol týraly jumǵan aýzyn ashpapty.
Bolatovtyń ózi kózi tirisinde batyr ataǵy buiyrmai, tasada qalǵanyna qatty nalyǵan.
Soǵystan keiin Qoshqarbaevqa joldaǵan hatynda:
“Munyń bári qalai jalǵan bolýy múmkin? Bizge qarata “Reihstagqa tý tigip, tiri qalsańdar omyraýlaryń ordenge tolady” degen Zinchenko men ózge ofitserlerdiń aitqany ótirik bolǵany ma? Ólimge bas tigip, oq pen ottyń ortasynan oralǵanymyzdyń óteýi osy ma?!” , – deidi qynjylysyn jasyra almai.
...
Aitqandai Bolatov pen Qoshqarbaevqa berilgen “Qyzyl juldyz” ordeninde bir shikilik bar syndy. Resei Qorǵanys ministriligi janyndaǵy soǵys jyldaryn zerdeleitin mekeme málimetinshe “Qyzyl juldyz” Bolatovqa Reihstagqa tý tikkeni úshin emes, soǵystaǵy sarbazdyq mindetin múltiksiz oryndaǵany úshin berilipti. Dál osyndai ataq Qoshqarbaevqa da “buiyrǵan” bolatyn.
Soǵystan keiin KSRO propagandasy Bolatovqa qara kúie jaǵyp, batyrdyń atyn jamanatty qylady. Orys qoǵamy Reihstagty baǵyndyrǵan jaýyngerdi keýdesinen keri iteredi. Batyr tabalaý men qaralaýǵa ushyraidy. Kim kóringenniń mazaǵy men ájýasyna qalady.
Bolatov aqyr sońy óz-ózine qol salyp óldi.
Al Qoshqarbaevtyń erligi Qazaqstan táýelsiz alǵanda ǵana elep eskerildi. 2001 jyly Nursultan Nazarbaev ol tusta ómirden ótip ketken batyrǵa “Halyq qaharmany” ataǵyn berdi. Qazaqstanda Qoshqarbaetyń atymen atalatyn aýyldar men kóshe ataýlary kóp.
“Al 19 jasar Bolatov kózden de, kóńilden ǵaiyp boldy. Jeti saǵat boiy jer baýyrlap Reihstagqa jetken batyrdyń erligi týraly esh jerde aitylmaidy. Tipti tarih páninde joq. Buǵan qalai nalymaisyń?!”, – deidi reseilik tarihshylar.
Resei basylymdary da biraýyzdan osy oidy qoshtap otyr. Tek Qoshqarbaevty tilge tiek etkendi jón kórmepti.
Eger álemjelidegi jazba Máskeýdiń tarapynan resmi rastalsa (nemese moiyndalsa), Qoshqarbaevtyń aty Bolatovpen qatar atalatyny aidan anyq. Biraq buǵan Kreml ideologtary jol bere me qoiar ma?
Reighstagqa tý tikken qazaqtyń Resei oqýlyǵyna enýi, osy kúnge deiin jeńisti orystyń atymen bailanystyryp kelgen Pýtinniń propagandasyna qaishy kelmes pe eken?..
Ázirlegen, Dýman BYQAI
