4 mamyr kúni Almaty qalasy Ortalyqtandyrylǵan kitaphanalar júiesine qarasty №32 kitaphana-bólimshesinde «Tula boiy aqyn bolyp jaratylǵan» atty onlain kezdesý ótti. Basty qonaǵymyz aqyn, jazýshy Kalima Mýrzabaeva.
Aqyn jany qashanda názik, tylsym syrǵa toly keledi. Búgingi bizdiń qonaǵymyz da shyǵarmashylyq álemge tereń boilaǵan. «Jazý bul – árkimge buiyrmaityn, joǵarydan berilgen syi» - deidi Kalima hanym. Óziniń alǵashqy óleńderin 7 jasynan bastap jazǵan ol, mektep kezinen bastap jazý ónerimen kózge túsken. Ustazdarynyń maqtaýyn alǵan sol kezdegi shyǵarma, mazmundamalary búginde poemalarmen, jyr jinaqtarmen almasqan. Qanmen kelgen qasietin erekshe maqtan tutatynyn, ári asa úlken jaýapkershilikti sezinetinin aityp ótti. Iá, atasy aqyn, ájesi halyq ánderiniń oryndaýshysy bolǵan keiipkerimiz kishkentaiynan bastap shyǵarmashylyq álemge jaqyn bolyp ósken.
Shyǵarmashlyq adamdar únemi damý ústinde bolý kerektigin erekshe atap aitty. Bul Kalima hanymnyń ómir súrý daǵdysyna ainalǵandai. Óitkeni búgingi tańda shyǵarmashylyq kezdesýler men mádeni is-sharalarda jii boi kórsetedi. Ásiresi óskeleń jas urpaqtyń damýy úshin belsendi túrde atsalysýda. Oǵan dálel «Iýjnye golosa» baiqaýy. Poeziia súier jastardyń basyn qosyp, báigeden oza shapqandaryn shyǵarmashyl ortaǵa erte bilgen. Endi ǵana alǵashqy qadamdaryn jasap júrgen jastarǵa kómek qolyn sozyp, shákirt tárbielep otyr.
«Meniń álemim, meniń qalam» dep sipattaǵan «Kalimagrad» rýhani jobasynyń da alar orny erekshe. Ádebi oqýlar, qoiylymdar, kezdesýler bunyń barlyǵy osy joba aiasynda ótedi. Árbir oqyrmanyn asyǵa kútetin Kalima hanym shyǵarmashylyq orta qalyptastyrýdyń mańyzyn aiqyn túsindirdi. Sebebi, aqparttyq tehnologiialar zamanynda rýhani daǵdarysqa túsý ońai deidi. Sondyqtan kitap betterin paraqtaýǵa asyq bolyńyzdar dei otyryp, kúnine bir ýaqyt 5 minýt bolsa da kitap oqýdy ádetke ainaldyrýǵa shaqyrady.
Sóz qudiretin seziný ári, ony ózgelerge jetkize bilý shynymen de kópke buiyrmas óner. Sondyqtan sol ortada aianbai eńbek etip júrgen árbir tulǵa bizdiń ádebietimiz úshin asa qajet. Rýhani damý basty maqsat bolýy kerek. Sonda ǵana elimzdiń mereiin ústem eterimiz anyq.
Móldir ADAMJAN,
Almaty qalasy Ortalyqtandyrylǵan
kitaphanalar júiesi qyzmetkeri
