اقىن جانى قاشاندا نازىك، تىلسىم سىرعا تولى كەلەدى. بۇگىنگى ءبىزدىڭ قوناعىمىز دا شىعارماشىلىق الەمگە تەرەڭ بويلاعان. «جازۋ بۇل – اركىمگە بۇيىرمايتىن، جوعارىدان بەرىلگەن سىي» - دەيدى كاليما حانىم. ءوزىنىڭ العاشقى ولەڭدەرىن 7 جاسىنان باستاپ جازعان ول، مەكتەپ كەزىنەن باستاپ جازۋ ونەرىمەن كوزگە تۇسكەن. ۇستازدارىنىڭ ماقتاۋىن العان سول كەزدەگى شىعارما، مازمۇندامالارى بۇگىندە پوەمالارمەن، جىر جيناقتارمەن الماسقان. قانمەن كەلگەن قاسيەتىن ەرەكشە ماقتان تۇتاتىنىن، ءارى اسا ۇلكەن جاۋاپكەرشىلىكتى سەزىنەتىنىن ايتىپ ءوتتى. ءيا، اتاسى اقىن، اجەسى حالىق اندەرىنىڭ ورىنداۋشىسى بولعان كەيىپكەرىمىز كىشكەنتايىنان باستاپ شىعارماشىلىق الەمگە جاقىن بولىپ وسكەن.
شىعارماشلىق ادامدار ۇنەمى دامۋ ۇستىندە بولۋ كەرەكتىگىن ەرەكشە اتاپ ايتتى. بۇل كاليما حانىمنىڭ ءومىر ءسۇرۋ داعدىسىنا اينالعانداي. ويتكەنى بۇگىنگى تاڭدا شىعارماشىلىق كەزدەسۋلەر مەن مادەني ءىس-شارالاردا ءجيى بوي كورسەتەدى. اسىرەسى وسكەلەڭ جاس ۇرپاقتىڭ دامۋى ءۇشىن بەلسەندى تۇردە اتسالىسۋدا. وعان دالەل «يۋجنىە گولوسا» بايقاۋى. پوەزيا سۇيەر جاستاردىڭ باسىن قوسىپ، بايگەدەن وزا شاپقاندارىن شىعارماشىل ورتاعا ەرتە بىلگەن. ەندى عانا العاشقى قادامدارىن جاساپ جۇرگەن جاستارعا كومەك قولىن سوزىپ، شاكىرت تاربيەلەپ وتىر.
«مەنىڭ الەمىم، مەنىڭ قالام» دەپ سيپاتتاعان «كاليماگراد» رۋحاني جوباسىنىڭ دا الار ورنى ەرەكشە. ادەبي وقۋلار، قويىلىمدار، كەزدەسۋلەر بۇنىڭ بارلىعى وسى جوبا اياسىندا وتەدى. ءاربىر وقىرمانىن اسىعا كۇتەتىن كاليما حانىم شىعارماشىلىق ورتا قالىپتاستىرۋدىڭ ماڭىزىن ايقىن ءتۇسىندىردى. سەبەبى، اقپارتتىق تەحنولوگيالار زامانىندا رۋحاني داعدارىسقا ءتۇسۋ وڭاي دەيدى. سوندىقتان كىتاپ بەتتەرىن پاراقتاۋعا اسىق بولىڭىزدار دەي وتىرىپ، كۇنىنە ءبىر ۋاقىت 5 مينۋت بولسا دا كىتاپ وقۋدى ادەتكە اينالدىرۋعا شاقىرادى.
ءسوز قۇدىرەتىن سەزىنۋ ءارى، ونى وزگەلەرگە جەتكىزە ءبىلۋ شىنىمەن دە كوپكە بۇيىرماس ونەر. سوندىقتان سول ورتادا ايانباي ەڭبەك ەتىپ جۇرگەن ءاربىر تۇلعا ءبىزدىڭ ادەبيەتىمىز ءۇشىن اسا قاجەت. رۋحاني دامۋ باستى ماقسات بولۋى كەرەك. سوندا عانا ەلىمزدىڭ مەرەيىن ۇستەم ەتەرىمىز انىق.
ءمولدىر ادامجان،
الماتى قالاسى ورتالىقتاندىرىلعان
كىتاپحانالار جۇيەسى قىزمەتكەرى
