كاسپيي تەڭٸزٸندەگٸ قايعىلى وقيعادان امان قالعان سارباز اقجول تەمەرحاننىڭ اناسى سامال كەۋەلوۆا سول كٷنگٸ جان كٷيزەلٸسٸن ەسكە الدى. ول ۇلىنىڭ تاعدىرى بەلگٸسٸز بولعان سەتتەر ٶمٸرٸندەگٸ ەڭ اۋىر ۋاقىتتىڭ بٸرٸ بولعانىن جازدى.
سامال كەۋەلوۆانىڭ جازۋىنشا, العاشقىدا وقۋ-جاتتىعۋدىڭ قاي ەسكەري بٶلٸمدە ٶتكەنٸن بٸلمەگەن. كەيٸن وقيعا اقجول قىزمەت ەتەتٸن بٶلٸمگە قاتىستى ەكەنٸن ەستٸگەندە, بالاسىنىڭ اماندىعىنا الاڭداپ, اقتاۋعا اسىققان.
«سول كٷنگٸ وقيعا مەنٸ سىندىردى… ٶمٸردە تالاي قيىندىققا مويىمايتىن, بەرٸنە شىداپ ٷيرەنگەن مەن دە سىندىم… جانىمنىڭ قانشالىقتى اۋىرعانىن سٶزبەن جەتكٸزۋ مٷمكٸن ەمەس. كەيبٸر سەتتەردٸ ەسٸمە تٷسٸرە الماي قالدىم. بۇرىن باسىمدا ەكٸ-ٷش تال عانا اق شاشىم بار ەدٸ. سول بٸر ساعاتتىڭ ٸشٸندە شاشىم اعارىپ, ٶزٸمدٸ ون جىلعا قارتايىپ كەتكەندەي سەزٸندٸم», – دەپ جازدى ول.
ساربازدىڭ اناسى ٶزەننەن اقتاۋعا دەيٸنگٸ جول سول كٷنٸ بۇرىنعىدان دا ۇزاق بولىپ كٶرٸنگەنٸن ايتادى. ۇلىنىڭ جاعدايى تۋرالى ناقتى اقپارات بولماعاندىقتان, وتباسى تەك جاقسى حابار كٷتكەن.
«“بالام سولاردىڭ ٸشٸندە بار ما? امان با? نە بولدى ەكەن?” دەگەن مىڭ سان سۇراق جانىمدى جەگٸدەي جەدٸ. تەك اللادان تٸلەدٸك… “يا, اللا, بالامدى امان ساقتاي گٶر! بالامدى ماعان قايتارشى!” دەپ جالبارىندىق», – دەيدٸ سامال كەۋەلوۆا.
ونىڭ سٶزٸنشە, سول سەتتە تەلەفون ارقىلى اقجولدىڭ ەكەسٸنٸڭ جىلاعان داۋىسىن ەستٸگەن. ال اقتاۋعا جاقىنداي بەرگەندە WhatsApp ارقىلى كەلگەن حاباردان كەيٸن ۇلىنىڭ اماندىعىنا قاتىستى ٷمٸتٸ كٷشەيگەن.
«سول سەتتە ۋاقىت توقتاپ قالعانداي بولدى… باۋىرىما ايقايلاپ: “قاتتى ايداشى! تەزٸرەك جەتەيٸكشٸ! شترافىن ٶزٸم تٶلەيمٸن!” – دەپ جالىنا ايقايلادىم. سول سەتتە مەن ٷشٸن جول ەرەجەسٸ دە, ايىپپۇل دا, باسقا ەشتەڭە دە ماڭىزدى ەمەس ەدٸ. تەك بالاما تەزٸرەك جەتسەم ەكەن, امان ەكەنٸن ٶز كٶزٸممەن كٶرسەم ەكەن دەگەن بٸر عانا تٸلەك بولدى», – دەپ ەسكە الدى ول.
سامال كەۋەلوۆا بالاسىنىڭ امان قالعانىنا شٷكٸرشٸلٸك ايتىپ, ٶزگە اتا-انالارعا مۇنداي سىناق تٸلەمەيتٸنٸن جەتكٸزدٸ.
«انا جٷرەگٸ بالاسىنا بٸردەڭە بولعانىن سەزسە, بٷكٸل ەلەم توقتاپ قالعانداي بولادى ەكەن… بالامنىڭ اماندىعىن بٸلمەي ٶتكەن سول بٸر ساعات مەن ٷشٸن عاسىرعا تاتيدى…
ەي, اللا… بالامەن سىناماشى… انانىڭ جٷرەگٸنە كٶتەرە المايتىن قايعىنى سالماشى… بالالارىمىز امان بولسىنشى… انالاردىڭ كٶز جاسى قۋانىشتان عانا اقسىنشى… ەشبٸر اتا-انا پەرزەنتٸنٸڭ تاعدىرى ٷشٸن وسىلاي جانىن شٷبەرەككە تٷيمەسٸنشٸ… بالامنىڭ اماندىعى ٷشٸن مىڭ شٷكٸر, اللام!» – دەپ جازدى ساربازدىڭ اناسى.
اقجول تەمەرحان كاسپيي تەڭٸزٸندەگٸ ەسكەري وقۋ-جاتتىعۋ كەزٸندە بولعان قايعىلى وقيعادان امان قالعان ساربازداردىڭ بٸرٸ. وقيعاعا قاتىستى مەن-جايلار بۇعان دەيٸن رەسمي ورگاندار تاراپىنان حابارلانعان بولاتىن.
