Kaspii teńizindegi qaiǵyly oqiǵadan aman qalǵan sarbaz Aqjol Temerhannyń anasy Samal Keýelova sol kúngi jan kúizelisin eske aldy. Ol ulynyń taǵdyry belgisiz bolǵan sátter ómirindegi eń aýyr ýaqyttyń biri bolǵanyn jazdy.
Samal Keýelovanyń jazýynsha, alǵashqyda oqý-jattyǵýdyń qai áskeri bólimde ótkenin bilmegen. Keiin oqiǵa Aqjol qyzmet etetin bólimge qatysty ekenin estigende, balasynyń amandyǵyna alańdap, Aqtaýǵa asyqqan.
«Sol kúngi oqiǵa meni syndyrdy… Ómirde talai qiyndyqqa moiymaityn, bárine shydap úirengen men de syndym… Janymnyń qanshalyqty aýyrǵanyn sózben jetkizý múmkin emes. Keibir sátterdi esime túsire almai qaldym. Buryn basymda eki-úsh tal ǵana aq shashym bar edi. Sol bir saǵattyń ishinde shashym aǵaryp, ózimdi on jylǵa qartaiyp ketkendei sezindim», – dep jazdy ol.
Sarbazdyń anasy Ózennen Aqtaýǵa deiingi jol sol kúni burynǵydan da uzaq bolyp kóringenin aitady. Ulynyń jaǵdaiy týraly naqty aqparat bolmaǵandyqtan, otbasy tek jaqsy habar kútken.
«“Balam solardyń ishinde bar ma? Aman ba? Ne boldy eken?” degen myń san suraq janymdy jegidei jedi. Tek Alladan tiledik… “Ia, Alla, balamdy aman saqtai gór! Balamdy maǵan qaitarshy!” dep jalbaryndyq», – deidi Samal Keýelova.
Onyń sózinshe, sol sátte telefon arqyly Aqjoldyń ákesiniń jylaǵan daýysyn estigen. Al Aqtaýǵa jaqyndai bergende WhatsApp arqyly kelgen habardan keiin ulynyń amandyǵyna qatysty úmiti kúsheigen.
«Sol sátte ýaqyt toqtap qalǵandai boldy… Baýyryma aiqailap: “Qatty aidashy! Tezirek jeteiikshi! Shtrafyn ózim tóleimin!” – dep jalyna aiqailadym. Sol sátte men úshin jol erejesi de, aiyppul da, basqa eshteńe de mańyzdy emes edi. Tek balama tezirek jetsem eken, aman ekenin óz kózimmen kórsem eken degen bir ǵana tilek boldy», – dep eske aldy ol.
Samal Keýelova balasynyń aman qalǵanyna shúkirshilik aityp, ózge ata-analarǵa mundai synaq tilemeitinin jetkizdi.
«Ana júregi balasyna birdeńe bolǵanyn sezse, búkil álem toqtap qalǵandai bolady eken… Balamnyń amandyǵyn bilmei ótken sol bir saǵat men úshin ǵasyrǵa tatidy…
Ái, Alla… Balamen synamashy… Ananyń júregine kótere almaityn qaiǵyny salmashy… Balalarymyz aman bolsynshy… Analardyń kóz jasy qýanyshtan ǵana aqsynshy… Eshbir ata-ana perzentiniń taǵdyry úshin osylai janyn shúberekke túimesinshi… Balamnyń amandyǵy úshin myń shúkir, Allam!» – dep jazdy sarbazdyń anasy.
Aqjol Temerhan Kaspii teńizindegi áskeri oqý-jattyǵý kezinde bolǵan qaiǵyly oqiǵadan aman qalǵan sarbazdardyń biri. Oqiǵaǵa qatysty mán-jailar buǵan deiin resmi organdar tarapynan habarlanǵan bolatyn.
