Ministrdiń aitýynsha, Biryńǵai zeinetaqy qorynan (budan ári – BJZQ) jinaqtardyń bir bóligin joǵaryda kórsetilgen qajettilikterge alý quqyǵyn kelesi azamattar paidalana alady:
- Zeinetaqy jinaqtary bar eńbekke jaramdy jastaǵy azamattar – «jetkiliktilik shegi» dep atalatyn somadan asatyn bir bóligi (shamamen 529,7 myń adam).
Negizgi qaǵidat – zeinetaqy jinaqtary azamattardyń jinaqtaýshy zeinetaqy júiesinen (budan ári – JZJ) bolashaq zeinetaqymen qamsyzdandyrylýy úshin qajet. Sondyqtan belgili bir soma zeinetaqy shotynda qalýy kerek. Osy somanyń artyǵyn azamattar óz qalaýy boiynsha joǵaryda kórsetilgen qajettilikterine paidalana alady.
- BJZQ-da jinaqtary bar zeinetkerler - qalǵan somanyń 50%-yna deiin (shamamen 178,4 myń adam).
Azamattardyń osy sanatynda jiyntyq zeinetaqy (jasyna bailanysty zeinetaqyny, bazalyq zeinetaqyny jáne BJZQ-dan tólemderdi qosa alǵanda) joǵalǵan tabys (buryn alynǵan jalaqy) mólsheriniń keminde 40%-yn quraýǵa tiis.
- Zeinetaqy annýitetin resimdegen jáne áli de jinaqtary bar azamattar – BJZQ-da qalǵan somany (shamamen 13,3 myń adam).
«Osylaisha, zeinetaqy jinaqtarynyń bir bóligin maqsatty paidalaný múmkindigin 721 myńnan astam qazaqstandyq paidalana alady», – dedi Birjan Nurymbetov.
Nurymbetov sondai-aq joǵaryda atalǵan sanattaǵy azamattar zeinetaqy jinaqtarynyń bir bóligin turǵyn úi jaǵdaiyn jaqsartý maqsatynda nemese ózderi, erli-zaiyptylar nemese jaqyn týystary (atalary/ájeleri, ata-analary, balalary, nemereleri, aǵa-inileri) úshin emdelýdiń aqysyn tóleý úshin paidalana alatynyn atap ótti. Maqsatty paidalaný úshin osy otbasy músheleriniń qarajatyn biriktirýge bolady.
«Belgilengen talaptarǵa sáikes kelgen jaǵdaida alyp qoiý sany boiynsha shekteýler kózdelmegen, iaǵni azamattar zeinetaqy jinaqtarynyń bir bóligin bir nemese basqa maqsatqa qaita paidalana alady», – dep atap ótti ol.
Turǵyn úi jaǵdailaryn jaqsartý úshin zeinetaqy jinaqtarynyń bir bóligin paidalaný turǵyn úi (bastapqy jáne qaitalama naryqta) nemese jer ýchaskesin satyp alý, ipotekalyq qaryzdardy qaita qarjylandyrý nemese óteý (kez kelgen ekinshi deńgeidegi bankte, kez kelgen baǵdarlama boiynsha), óz turǵyn úiin salý nemese jóndeý múmkindigin jáne turǵyn úi jaǵdailaryn jaqsartýdyń basqa da nusqalaryn kózdeidi. Zeinetaqy jinaqtaryn paidalana otyryp satyp alynǵan turǵyn úi 5 jyl ótkennen keiin ǵana satylýy múmkin.
«Bir tereze» qaǵidaty boiynsha zeinetaqy jinaqtarynyń bir bóligin turǵyn úi jaǵdaiyn jasqartýǵa maqsatty paidalanýǵa Ýákiletti operator retinde qaita qurylatyn «Otbasy Banki» («Turǵyn úi jinaqtaýshy banki» AQ – TÚQJB) usynylady.
Zeinetaqy jinaqtaryn tóleý esebinen turǵyn úi jaǵdailaryn jaqsartý tártibin QR Indýstriia jáne infraqurylymdyq damý ministrligi bekitedi.
Zeinetaqy jinaqtarynyń bir bóligin emdelý tólemine paidalaný úshin salymshy Densaýlyq saqtaý basqarmalary (oblystar, respýblikalyq mańyzy bar qalalar) janynan arnaiy qurylǵan komissiialarǵa júginedi dep boljanýda. Meditsinalyq kómek kórsetý qajettiligi týraly komissiianyń qorytyndysyn alǵannan keiin, emdelýden ótý úshin klinikany tańdaǵannan keiin salymshy emdelýge aqy tóleý úshin tólengen zeinetaqy jinaqtaryn maqsatty paidalaný jónindegi ótinimmen ýákiletti operatorǵa (QR Úkimeti aiqyndaityn bolady) júginedi.
Zeinetaqy jinaqtaryn tóleý esebinen meditsinalyq kómek alýǵa azamattardy jiberý qaǵidalaryn QR Densaýlyq saqtaý ministrligi aiqyndaityn bolady.
Salymshy zeinetaqy jinaqtaryn basqarýǵa berý úshin jeke qarjy kompaniiasyn tańdaýdy BJZQ-ǵa ótinish berý arqyly júzege asyrady.
Zeinetaqy aktivterin senimgerlik basqarýǵa berý qaǵidalaryn QR Qarjy naryǵyn retteý jáne damytý agenttigi aiqyndaityn bolady.
