Depýtattyń aitýynsha, Úkimettiń indetpen kúreske tolyq daiyndyǵy bolǵan, biýdjet qazynasynan da qyrýar qarjy bólingen. Biraq qoldaǵy tsifrlar, kerisinshe olardyń bul isti durys atqara almaǵanynyń saldary ekenin aiqyndap otyr.
- Bul kezde keibir memlekettik organdardyń qabiletsizdigi, jaýapsyzdyǵy men atqarǵan jumysynyń tiimsizdiginiń saldary anyq kórindi, bul ashy da bolsa shyndyq. Endi osynyń bárinen biz qorytyndy jasap, jaǵdaidy túzetýge tyryspasaq, alda ol aldymyzdan shyǵyp, ońdyrmasy anyq.
Qurmetti Asqar Uzaqpaiuly, sizden osynda - Parlamentke kelip, halyq aldynda, bizderge - halyq ókilderine Kovid-19-pen kúres boiynsha júrgizilgen jumystardyń nátijeleri, bólingen orasan zor qarajatty paidalaný týraly egjei-tegjeili esep berýińizdi suraimyn.
Koronavirýs qurbandary nege kóp, qazirgi sharasyz jaǵdaidyń sebepterine ne sebep boldy? Bul saýaldar jaýap berýdi kútedi. Jaraidy, Densaýlyq saqtaý ministrin ornynan alyp tastadyq, osymen sonda is bitti me? Bul jaǵdaiǵa, ótken qatelikterge sonda eshkim jaýap bermei me? Oǵan kim jaýap berýi kerek, - deidi óz saýalynda depýtat.
Sonymen qatar, ol úkimet basshysyna keibir memlekettik organdardyń óz mindetin durys oryndai almaýynyń sebebi men saldary boiynsha jaǵdaidy taldaýdy da usyndy. Ol Úkimet basshysyna kóp sozbai, qysqa merzim ishinde Parlamentke kelip, tez arada bul máselege qatysty esep berýin surady.
