Nur-Sultan ákimdiginiń resmi saitynyń málimeti boiynsha, biyl baiqaý el Táýelsizdiginiń 30 jyldyǵyna orailastyryldy.
Is-shara sanitarlyq normalardy saqtai otyryp ótkizildi. Qatysýshylardyń qaýipsizdigin qamtamasyz etý úshin amfiteatrǵa kirý "Ashyq" qosymshasy arqyly júzege asyryldy.
Aita ketý kerek, "Mereili otbasy" ulttyq konkýrsyn ótkizýge Qazaqstan Respýblikasynyń Tuńǵysh Prezidenti – Elbasy Nursultan Nazarbaev 2013 jyly otbasylyq qundylyqtardy dáripteý jáne otbasy institýtynyń mártebesin arttyrý maqsatynda bastamashylyq jasaǵan bolatyn.
Jyldan jylǵa onyń qatysýshylarynyń sany artyp keledi.
Máselen, 2018 jyly baiqaý komissiiasynyń qaraýyna 51 elordalyq otbasy ótinim berse, 2019 jyly 60-tan astam ótinim túsken.
Biyl "Mereili otbasy-2021" baiqaýyna qatysqysy kelgen otbasylar sany 120-ǵa jetti. Olardyń qatarynda kópbalaly otbasylar, eńbek áýletteri, kásipkerler jáne t.b. bar.
Osylaisha, komissiia sheshimimen kópbalaly shyǵarmashylyq otbasy Samarbaevtar ulttyq baiqaýdyń qalalyq kezeńiniń jeńimpazy bolyp tanyldy. Suńǵat pen Alma 4 qyz ben ul tárbielep otyr. Otbasynyń barlyq múshesi sportty jaqsy kóredi, salaýatty ómir saltyn ustanady.
Otaǵasy – injener mamany, 4 tildi meńgergen. Zaiyby Alma – jýrnalistika salasyndaǵy PhD doktory, aǵa oqytýshy, jaqynda ǵana otbasylyq qundylyqtar týraly «Baqytty kelinshek» kitaby jaryq kórgen. Otbasy konkýrstyń respýblikalyq kezeńine qatysýǵa daiyndalýda.
Ekinshi oryndy pedagog Nosievter áýleti men órt sóndirý jáne avariialyq-qutqarý jumystary qyzmetiniń mamandary – Bekenovtar otbasy ózara bólisti.
"Mereili otbasy-2021" konkýrsynyń qola júldesin Omarovtar otbasy men alty bala tárbielep otyrǵan, kásipkerlerden quralǵan Oshaqbaev otbasy jeńip aldy.
Jeńimpazdarǵa diplomdardy QR Prezidentiniń keńesshisi, QR Prezidenti janyndaǵy Áielder isteri jáne otbasylyq-demografiialyq saiasaft jónindegi Ulttyq komissiia tóraǵasynyń orynbasary Marjan Ákimjanova men elorda ákiminiń orynbasary Ashat Oralov tabys etti.
Ashat Oralov qala ákiminiń atynan qalalyq baiqaýǵa qatysqany úshin alǵys bildirdi. Komissiianyń sheshimi boiynsha úzdik otbasylar aqshalai syilyqtarmen jáne elorda ákiminiń alǵys hattarymen marapattaldy.
Ulttyq konkýrstyń jeńimpazdaryn elordanyń tanymal ártisteri men shyǵarmashylyq ujymdary quttyqtady.
Aita keteiik, Nur-Sultanda otbasy institýtyna erekshe kóńil bólinedi, otbasylarǵa jan-jaqty qoldaý kórsetiledi.
Osylaisha, eki jyl buryn elordada "Januia" otbasy institýtyn qoldaý ortalyǵy ashyldy, onda "bir tereze" qaǵidaty boiynsha qala turǵyndary túrli mamandardan, zańgerlerden bastap psihologtarǵa deiin keńes ala alady, áleýmettik qoldaý, turǵyn úi, jumys jáne t.b. alý suraqtarymen júgine alady.
Munda otbasylar úshin túrli baǵyttar boiynsha is-sharalar ótkiziledi, onyń ishinde psihologiialyq jáne motivatsiialyq treningter, jumysqa ornalastyrý jáne kámeletke tolmaǵandardyń quqyǵyn qorǵaý boiynsha túsindirý jumystary, biznes júrgizý boiynsha master-klastar jáne t.b.
Sondai-aq, kópbalaly otbasylardyń ár balasyna memleket áleýmettik kómek bóledi. Oqý jylyna daiyndyq barysynda qalada jalpyǵa mindetti oqý baǵdarlamasy jáne «Mektepke jol» qaiyrymdylyq aktsiiasy ótkiziledi. Kómekke muqtaj oqýshylarǵa mektepke qajet kerek-jaraqtary, riýkzaktar, mektep kiimderi jáne t.b. beriledi.
Sonymen qatar, kópbalaly jáne halyqtyń áleýmettik osal toptaryna jatatyn otbasylar elordada jalǵa beriletin turǵyn úi alý úshin kezekke tura alady.
Budan basqa, kópbalaly, tolyq emes jáne múmkindigi shekteýli balalardy tárbielep otyrǵan otbasylar úshin "Baqytty Otbasy" turǵyn úi baǵdarlamasy jumys isteidi, oǵan qatysýshylar turǵyn úi satyp alýǵa buryn-sońdy bolmaǵan tómen mólsherleme boiynsha qaryz ala alady.
