Nazarbaev Ziiatkerlik mektebi: Qazaqstan pedagogtardyń biliktiligin artyrý – bizdiń maqsatymyz
Ǵalamtor qoljetimdi ǵasyrda aqparattyq-kommýnikatsiialyq tehnologiialarsyz bilim berý men oqytýdy elestetý múmkin emes. Biz 2012 jyly kýrstarymyzda pedagogter arasynda tsifrlyq saýattylyqty damytýdy alǵa maqsat etip qoidyq: derbes kompiýterdi senimdi paidalanýdy jáne elektrondy baǵalaý portalymen jumys isteýdi úirenýge, tsifrlyq resýrstardy qoldana otyryp ártúrli sabaq materialdaryn jasaýǵa, forýmdarda, chattarda jáne blogtarda tájiribe almasý arqyly onlain-kommýnikatsiialaryn damytýǵa kómektestik. Júieli negizde muǵalimderge arnalǵan qyzyqty onlain kýrstar ázirlep engizemiz, kásibi sheberlik baiqaýlaryn jáne apta saiyn mektep muǵalimderin dáris berýshi retinde tarta otyryp, oqytý vebinarlaryn uiymdastyramyz. Búgingi tańda muǵalimder aqparattyq-kommýnikatsiialyq tehnologiialardy óziniń bilimi men biliktiligin arttyrýǵa senimdi ári belsendi túrde kiriktire bastady. Pedagogter bul tsifrlyq tehnologiialar pedagogikalyq is-árekettiń sipatyn birtindep ózgertetinin túsinedi.
Qazirgi tańda ortalyq pedagogterdiń biliktiligin arttyrýdyń barlyq baǵdarlamasyn qaita qarastyrýda, olardyń bir bóligi tolyǵymen onlain formatqa kóshiriledi. Barǵan saiyn tanymal bolyp kele jatqan qashyqtan oqytý pedagog pen bilim alýshy arasyndaǵy ózara aýditoriialyq árekettesýdi qajet etpeitindigimen erekshelenedi, bul epizodtyq emes, júieli sipatqa ie. Al jumystyń ónimdi bolý jaýapkershiligi bilim alýshylarǵa júkteledi.
Qashyqtan oqytý formatynda tiimdi oqytý úshin mindetti 3 komponent qarastyrylýy tiis: beinesabaqtar (teledidar, ǵalamtor jáne túrli platformalarda), oqýshynyń óz betinshe jumys jasaýy, oryndalǵan tapsyrma boiynsha muǵalimmen keri bailanys jasaýy. Sondai-aq, qashyqtan oqytýdyń mańyzdy bóligi, oqýshylar men ata-analarǵa keńes berý múmkindigi bolyp tabylady. Árine, úiden oqytý belgili bir ózindik tártip pen ózin-ózi retteýdi talap etedi.
Qashyqtan oqytýdy engizýbarlyq orta bilim berý júiesi úshin úlken jańalyq. Qazirgi kezde 7 myńnan astam mektep oǵan aýysýǵa tiis bolyp turǵan jaǵdaida pedagogter men ata-analardyń alańdaýyn túsinýge bolady. Ata-analar úide oqytýdy uiymdastyrý jáne barlyq pán boiynsha baǵdarlamany tolyq meńgerýdi baqylaý quzyrettilikterin jetkiliksiz dep sanaidy. Muǵalimder jaýapkershilik júgin: onlain sabaq josparyn ázirleý, al ol ádettegi jospardan erekshelenedi, balanyń óz betinshe jumys isteýine túsinikti resýrstardy tańdaý, ol jumysty baǵalaýdy, jeke nemese toptyq onlain keńes ótkizýdi igere almaimyn-aý dep ýaiymdaidy. Árine, bul qiyn bolady, biraq bul bizdiń eldiń ǵana aldynda turǵan másele emes.
Pedagogikalyq sheberlik ortalyǵy ata-analarǵa, oqýshylar men muǵalimderge túsindirme beinerolikterin daiyndady, tipti eki apta buryn «Qashyqtan oqytýdy uiymdastyrýdyń erekshelikteri» atty eki tilde vebinar ótkizdi. Mundaǵy jaǵdaidyń basty artyqshylyǵy – az ýaqyt ishinde igerip, barlyq qashyqtan oqytý tehnologiialaryn engizýdi innovatsiiany qoldaý dep qabyldaidy.
Bir synypta bilim alatyn balalardyń oqý qarqyny men qajettilikteri ártúrli bolýy múmkin. Muǵalimge 40 minýttyq sabaq ishinde ár balaǵa baǵyttalǵan tásildi qoldaný qiynǵa soǵady, degenmen ony sabaqtan tys onlain oqytý arqyly jasaýǵa ábden bolady. Bul qabileti joǵary oqýshyǵa da, «damymai qalýyna» jol bermeý úshin de, oqý materialyn igerýde qiyndyqtary bar oqýshylar úshin de qajet.
2020-2021 oqý jylynda qazaqstandyq mektepterdiń barlyǵy aralas oqytý formatyn belsendi engizetin bolady jáne geografiialyq shekaralar joiylyp, árbir oqýshy, onyń ishinde aýyl mektebiniń oqýshysy, eń úzdik pedagogter men úzdik mektepterdi onlain formatta tańdaýyna jáne oqýǵa múmkindigi bolady dep oilaimyn.
Ortalyq biliktilikti arttyrý baǵdarlamalaryn ázirleýmen, olardy júzege asyrý úshin trener quramyn daiyndaýmen, mektepke deiingi jáne mektep bilim berý júiesiniń basshylary men pedagogterin, JOO jáne kolledjderdiń oqytýshylaryn, bilim berý mekemeleri men bólimderiniń basshylary men qyzmetkerlerin oqytýmen jáne ádistemelik qoldaýmen ainalysady. Sonymen qatar, pedagogterge arnalǵan ádistemelik quraldar men halyqaralyq statýsy bar jýrnal daiyndap basady, úlken zertteý jumysyn júrgizedi. Aitpaqshy, sońǵy eki jylda bizdiń Ortalyqtyń 8 baǵdarlamasy ACQUIN akkreditteý, sertifikattaý jáne sapany qamtamasyz etý Institýtynda (Germaniia) sapanyń halyqaralyq standarttaryna sáikes sertifikattaýynan ótti. Biz bilim berý ónimderimizdi elimizden tys ta iske asyrýdy qolǵa aldyq. Atap aitsaq, biz eki jyl qatarynan Resei jáne Túrkimenstan mektepteri men kolledjderiniń muǵalimderin oqytyp kelemiz.
Medina BAQYT
