"QAZBILIM GROUP" kompaniiasynyń basqarma tóraǵasy, ulttyq mektepter jobasy jetekshisi Aiatjan Ahmetjan oqý-aǵartý ministri Ǵani Beisembaevtyń qýdalaýyna ushyraǵanyn málimdedi, - dep habarlaidy Dalanews.kz.
2023 jyly Ashat Aimaǵambetov ministr laýazymynan bosatyldy. Sheneýnik 2019 jylǵy maýsymnan bastap 2022 jylǵy maýsymǵa deiin bilim jáne ǵylym ministri qyzmetin atqardy. 2022 jylǵy 11 maýsymnan bastap oqý-aǵartý ministri bolyp taǵaiyndaldy. Ol 4 jylǵa jýyq ýaqytta "halyqtyń súiikti ministrine" ainaldy. Artynsha bul qyzmetke Ǵani Bektaiuly Beisembaev keldi. Buǵan deiin ol Y.Altynsarin atyndaǵy ulttyq bilim akademiiasynyń prezidenti qyzmetin atqarǵan edi.
Pedagog Aiatjan Ahmetjan Beisembaevtan aitarlyqtai jańalyq kútpeitinin ashyq aitty.
"Oqý-aǵartý ministrligine ministr kelgeli 1 jyl 4 ai boldy. Bir orynda tur. Sóz, sóz, sózben kele jatyr. Muǵalimderdiń de attestatsiialaý máselesi áli sheshilgen joq. Endi sheshildimen qujat qabyldandy. Qujatynyń ózi shikili-pisili. Sondyqtan táp-táýir júrip, izge túsip qalǵan poiyzdy aldyq ta, toqtata saldyq. Jańa izge túsip, júrip ket degenshe taǵy ýaqyt ótip jatyr.
Shyny kerek, myna ministr tusynda bilim salasynan úlken jańalyq kútpeimin", - dedi ol Barys Media-ǵa bergen suhbatynda.
Ulttyq mektepter jobasynyń negizin qalaýshy ózine qandai qysymdar jasalǵanyn baiandady.
"Úirengenmin, (jolyn bógeý - esk.), ondai mende kóp bolady. Sol úshin de men mektep direktorlyǵynan kettim. Sypaiy túrde "ket" dedi, "jaqsy" dep kettim. Óitkeni maǵan oryn da, basqa da qyzyq emes. Maǵan bir ǵana nárse qyzyq. Bilim salasyna, urpaqtyń bolashaǵyna qyzmet etý deitin múmkindik qana qyzyq. Al ol múmkindikti maǵan ministrlik bermese memlekettiń zańdary beredi.
...Ótken jyly Astana qalasynda "№90 gimnaziianyń direktorlyǵynan ketsin" dedi. Ony Bilim basqarmasy "saǵan ket dep jatyr" dep jetkizdi. "Qulaǵym tynysh bolsynshy, kete salshy" dep. Ózime qoiǵan naqty printsipterim bar: ataq úshin júgirmeimin, oryn úshin kúrespeimin degen. "Jaqsy" dedim, kete saldym. Odan keiin QAZBILIM ulttyq litseilerin ashqan kezde litsenziia berilmesin degen tapsyrmalar boldy. Ministr tarapynan, ministrlik tarapynan.
Bári bir sóz ǵoi. Ony da zańmen dáleldep, ótinishimizdi berip júrip, litsenziiamyzdy aldyq. Mektepterimizge tekserister kirgizdi. Aiyppulyn tóledik. Teksergennen keiin aiyppul tabady ǵoi.
Al áleýmettik jelide "Aiatjannyń artynda kim tur?" degen bir qiturqy posttar jazǵyzdy. Meniń artymnan Qytai izdegisi keletinder, meniń artymnan saiasat izdegisi keletinder kóp. Men saiasatker de emespin. Taza bilim salasynyń menedjerimin. Árine, adymdap, qaryshtap basyp júgirgiń keledi", - dedi ol.
Aita keteiik, Beisembaev tusynda mekteptegi din máselesi de ýshyǵyp tur. Jyl saiyn ministrlik oqýshylardyń hidjab kiiýi, namaz oqýy sekildi máselelerde synǵa qalady.
