Ekibastuzda toidaǵy taǵamnan ýlanyp, 32 adam aýrýhanaǵa túsken, - dep habarlaidy Dalanews.kz.
Jergilikti meiramhananyń birinde jappai tamaqtan ýlaný týraly aqparat áleýmettik jelide 15 sáýirde keshke tarady.
"13 sáýirde biz 200 adamǵa "qyz uzatý" toiyn ótkizgen edik, toida bolǵan barlyq adam tamaqtan ýlandy. Báriniń dene qyzýy kóterilip, qaltyrap, qurysyp, qusyp jatyr, diareia mazalaidy. Ekibastuzdaǵy juqpaly aýrýlar aýrýhanasynda 25-ten astam adam jatyr, olardyń kópshiligi Qaraǵandy, Astana, Pavlodar jáne Aqsýdan keldi. Shara qabyldanýyn suraimyz", - delingen jazbada.
Jazbanyń astyna Aqsý men Pavlodar qalalarynan balalarymen kelgen birneshe adam pikir qaldyrǵan. Olar da turǵylyqty jeri boiynsha aýrýhanaǵa barýǵa májbúr bolǵan. Pavlodar oblysynyń Densaýlyq saqtaý basqarmasy jappai ýlaný deregin rastady.
"14 sáýirden bastap Ekibastuz qalalyq aýrýhanasynyń infektsiialyq bólimshesine tamaqtan ýlaný jáne bakteriialyq-ishek infektsiiasy belgileri bar naýqastar jappai júginip jatyr. Naýqastarda qusý, álsizdik, ishtiń aýyrýy, dene qyzýynyń joǵarylaýy baiqalady. Epidemiologiialyq syrtartqyny jinaý kezinde olardyń barlyǵy 13 sáýirde qalanyń meiramhanasynyń birinde ótken is-sharanyń qonaǵy ekeni anyqtaldy", - dep túsindirdi óńirdiń densaýlyq saqtaý basqarmasy.
Dárigerlerdiń aitýynsha, zardap shekkender qabyldaý bólimshesinde qaralyp, asqazandy tazalaǵannan keiin infektsiialyq bólimshege jatqyzylǵan.
"14-15 sáýir aralyǵynda 32 adam aýrýhanaǵa júgindi, olardyń tórteýi aýrýhanaǵa jatýdan bas tartty, qalǵandary qazirgi ýaqytta emdelip jatyr. Jaǵdai ortasha aýyrlyq dárejesi retinde qarastyrylady", - dedi vedomstvo ókilderi.
Ekibastuz qalalyq sanitarlyq-epidemiologiialyq baqylaý basqarmasynyń málimetinshe, sanitarlyq dárigerler adamdar jappai ýlanǵan meiramhanany tekserýge kiristi.
"Tamaqtan ýlaný jaǵdaiy boiynsha basqarma Qazaqstan Respýblikasynyń Kásipkerlik kodeksine sáikes meiramhanaǵa qatysty jospardan tys tekserý júrgizilip jatyr", - dep habarlady Ekibastuzdyń sanepidbaqylaý basqarmasyndaǵylar.
