Maqtaraldaǵy bal arasyn baǵyp otyrǵan «Azamat» sharýa qojalyǵynyń ónimine búginde qytaılyqtar «quda túsip» qoıypty. Qojalyqtyń jumysyn júrgizip otyrǵan Marat Muratovtyń aıtýynsha, aralardyń bir uıashyǵynan jylyna 40 lıtr bal alady eken. Mundaǵy 3 telejkadaǵy 300 uıashyqtan jylyna 15 tonnaǵa jýyq bal alyp jatyr. «Aralar sýyqqa tózbeıdi. Maqtaral aýdanynyń aýa-raıy basqa aımaqtarǵa qaraǵanda áldeqaıda jyly ári mundaǵy jaýyn-shashynnyń az bolýy – bal arany baǵýǵa óte qolaıly. Sondaı-aq, kermek, jantaq, jyńǵyl, maqtanyń gúli sıaqty t.b. aralar nár alatyn ósimdikter munda óte kóp» - deıdi Marat Muratov7
Bal aranyń ónimine degen suranys óte joǵary. Baldy Maqtaraldyń mektepteri men balabaqshalary-aq tolyqtaı satyp alady eken. Ónimniń lıtri – 1000 teńge. Tipti, 4-5 ese qymbat baǵaǵa Qytaıdan júz tonna ekologıalyq taza balǵa tapsyrys kelgen. Qojalyq sol suranysty óteý úshin jumys jasap jatyr. Sondaı-aq, «Tehas baly» qaýymdastyǵy da «Azamat» sharýa qojalyǵynyń balyn jıi satyp alady.
Arany baǵýdyń esh qıyndyǵy joq. Tek kókqus dep atalatyn qustan qoryp, balyn ýaqytynda jınap alyp otyrý kerek eken.
Nursultan Nazarbaev «Qazaqstan - 2050» Strategıasynda: «Bizdiń elimiz ınvestısıa úshin jáne tehnologıalar transferti úshin Eýrazıadaǵy eń tartymdy bolýǵa tıis. Munyń prınsıpti mańyzy bar. Biz ınvestorlarǵa qolda bar artyqshylyqtarymyzdy kórsetýge tıispiz»,- dep atap ótken bolatyn. Osy oraıda qolda bar artyqshylyǵyn kórsetip úlgergen Maqtaraldyń bal sharýashylyǵy áli talaı ınvestorlardy ózine qyzyqtyratyny sózsiz.
