"Eshqashan memlekettik sektorǵa barmaimyn" degen keiipkerimiz soǵysta halqyn jumyldyryp qana qoimai, bir ózi tutas aqparattyq agenttiktiń qyzmetin qatar atqaryp otyr.
...
Vitalii Kimniń ómir jolyna úńilmes buryn, aldymen onyń kelissóz júrgizýdegi talantyn tani bilgen eks-Dýma depýtaty, jýrnalist Igor Iakovenkonyń pikirine oryn bereiik.
Reseidiń basqynshylyq saiasatyna batyly baryp, qarsy shyqqan Iakovenko "Pýtinmen kelissóz júrgizýge naq osy – Kimdi attandyrý kerek" dep sanaidy.
"Pýtin Ýkrainaǵa beker bas suqty. 40 mln halyqty tize búktiremin dep, barmaǵyn shainap qaldy. Ol bul shaiqasta jeńiledi. Kremldiń kúshi sarqylǵan, qansyraǵan kósemimen kelissóz júrgizýge Vitalii Kimdi jiberý kerek.
Zelenskii dál qazir álemdik masshtabtaǵy tulǵa! Onyń deńgeii Baiden, Djonson sekildi jahandyq liderlermen qatar tur.
Zelenskii qazirden bastap soǵystan keiingi Ýkrainany edel-jedel qalpyna keltirýdi oilastyra bastaýy tiis.
Al Pýtinniń máselesin sheshýdi Vitalii Kimge tapsyrý qajet.
Tribýnalǵa jóneltpei tura Kimniń aldynan ótkizip alǵanymyz jón. Pýtinniń mysyn basatyn jalǵyz adam dál osy - Kim. Senbeseńiz, onyń telegram-arnasyn sholyp shyǵyńyz, turǵyndarmen tildesý stiliniń ózi soǵystan qaljyraǵan halyqqa kúsh-qýat beredi. Basqynshylardyń bombysy kúni-túni tópelep jatsa da, jasymaǵan, júzinen kúlki ketpeidi, týǵan qalasyn tus-tustan antalaǵan jaýǵa aldyrar emes.
Pýtinmen kelissóz júrgizýdi Kimge tapsyrý qajet. Bul Pýtinniń aqyrǵy kelissóz bolady", – deidi Iakovenko.
...
Búginde ýkrainalyqtar jedel aqparat alyp otyrǵan tanymal Telegram-kanaldy Kimniń ózi emes, kommýnikatsiia boiynsha keńesshisi Viktoriia Oleinik 24 aqpan tańǵy saǵat 7-de, janarmai beketinde turyp ashqan eken.
Dál osy sát «Kýlbakino» áskeri aerodromynda atys bastalyp, turǵyndarǵa habarlama jiberý qajet bolady.
«Eshkim kanal munshalyq tanymaldyqqa ie bolady dep oilamady», –deidi Oleinik.
Alǵashqy jarty saǵattyń ózinde 1000 adam tirkelgen. Qazir Kimdi 730 000 myń oqyrman oqidy. Nikolaev qalasynda 490 000 myń, al oblysta– 1,1 mln turǵyn turady.
Bilikke kelgenge deiin kásippen ainalysqan ol 30 jasqa deiin eki ret bankrotqa ushyraidy, al 40 jasynda kásibin birjola tastaidy.
...
Resei áskeri Nikolaevqa soǵystyń birinshi kúninen shabýyl jasaýda. Basqynshylardyń oblys pen qalany tez basyp alamyz degen josparlary júzege aspai jatyr.
Nikolaev oblystyq memlekettik ákimshiliginiń basshysy Vitalii Kim qorǵanysty saqtap qana qoimai, barynsha pozitivti kóńil-kúimen halyqtyń rýhyn kóterip júr.
«Soǵys bastalǵan sátte qoryqtyq, qobaljydyq. Úrei qushaǵynda júrsek okkýpantarǵa toitarys bere almas edik. Birden esimdi jiyp, basqynshylardyń qarymta qaitarýdyń josparyn jasaýǵa kiristik», – deidi Kim.
Ol Telegram-kanalyn kún saiyn: «Qaiyrly kesh, biz Ýkrainadanbyz» degen ánniń sózderinen bastaidy.
Soǵysqa deiin baspasóz jiyndarynda jýrnalistermen ázildesip turatyn oblys basshysyn media ókilderi jii synaǵan.
«Qazir oblys basshysynyń pozitivti kóńil-kúiin bári basqasha qabyldaidy»,-deidi Oleinik. Kim sportty jaqsy kóredi, bala kezinde thekvondo, basketbol, kikbokspen ainalysqan.
Vitalii Kim Nikolaevtaǵy Ulttyq keme jasaý ýniversitetin «Kásiporyn ekonomikasy» mamandyǵy boiynsha bitirip, biznespen ainalysqan. Ol seriktestermen birge Nikolaev, Herson jáne Zaporojede turǵyn úiler salatyn S. DEVELOP qurylys kompaniiasynyń negizin qurǵan. Kompaniia saitynda salynǵan alty keshen bar.
2019 jyly Nikolaevta «Halyq qyzmetshileri» partiiasynyń sailaýaldy shtabyn basqarǵan.
BAQ-qa bergen suhbatynda ol:
«Eger prezident Vladimir Zelenskii bolmasa, saiasatqa barmas edim» dep málimdegen.
«Nikolaevta prezidenttik partiia sailaýǵa deiin aimaqty túsinetin jáne protsesterdi tez rettei alatyn adamǵa muqtaj boldy», deidi Oleinik. Bul ýaqytta Kim óziniń jeke biznesine basqarýshy seriktester men direktorlardy jaldap otyrǵan.
«Maǵan kelinshegim kóp demalatynymdy aityp, balyq jáne ań aýlaýymnyń jiilep ketkenin eske saldy. Osy kezde men birdeńemen ainalysý qajettigin túsindim»,-deidi ol.
Kim «Halyq qyzmetshileri» shtabyna bastapqyda erikti bolyp kelgen. Sodan keiin Shtab bastyǵynyń orynbasary, sosyn basshy boldy. Shtabta ol paidaly bolý úshin óziniń jeke kásipker ekenin jasyrǵan, tipti, memlekettik sektorǵa basshylyq qyzmetke barýdy josparlamaǵan.
Sol jyly Nikolaevtaǵy qala meriniń sailaýynda «Halyq qyzmetshileri» partiiasynyń úmitkeri jeńiliske ushyraidy, al partiia atynan gýbernatorlyqqa Kievten Aleksandr Stadnik degen adam keledi.
Biraq Stadnik jergilikti kásipkerlermen til tabysa almaǵandyqtan, prezident Keńsesi ony aýystyrýǵa sheshim qabyldaidy.
Kimdi oblysqa basshy retinde Nikolaevtaǵy «Halyq qyzmetshileri» fraktsiiasynyń basshysy David Arahamiia usynǵan. Ol ekeýi bir-birin mektepten beri biletin bolyp shyǵady.
...
Oblys basshysy bolý týraly sheshimdi Kim eki táýlik ishinde qabyldaidy. 2020 jyldyń 25 qarashasy kúni ol memlekettik sektorǵa barǵysy kelmeitinin aityp otyrsa, 27 qarasha ony taǵaiyndaý týraly qaýlyǵa Zelenskii qol qoiady.
«Men Kievke jeke sharýalarymmen kelgen bolatynmyn, sodan David qońyraý shalyp, keńsesine kelýimdi ótindi. Sóitsem olar meni birden suhbattasýǵa shaqyrǵan eken», – deidi Kim.
Osylaisha ol kútpegen jerden million turǵyny bar oblystyń basshysy bolyp taǵaiyndalady. Kimniń taǵaiyndalýyn biznes ókilderi jaqsy qabyldaǵan.
Jergilikti turǵyndardyń sózinshe, ol beibit kúnde 20 jyl jóndeý kórmegen oblystaǵy jol qurylysyn jandandyryp, «Úlken qurylys» baǵdarlamasy aiasynda 300 shaqyrym joldy jańartqan.
Sondai-aq, agrarlyq sektordy damytýdy qolǵa alyp, investorlardyń kómegimen jańa sýarmaly júie salýdy josparlaǵan.
...
Soǵystyń alǵashqy kúnderinde Kim jergilikti biznes pen sheneýnikterdi jinap, olardy qala men aimaqqa kómektesýge baǵyttaǵan.
Al ózi bolsa qaladan shyqpai, kún-tún demei jumys isteýge daiyn ekenin kórsetken.
Soǵys aiaqtalǵannan keiin juldyzdy sheneýnik jaqsylap iship, toilap alyp, oblystaǵy agrarlyq sektor men týrizmdi damytýdy qolǵa alamyn dep otyr.
«Biyl jańa sport nysandarynyń qurylysyn bastaýdy josparlaǵan edik. Sonyń ishinde muz aidyny bar, bes birdei sport mektebi jáne aimaqtaǵy sport ýchilishelerin jańartýdy kózdegenbiz. Ýkrainaǵa basyp kirgen «pýtinshilderdiń» kesirinen qolǵa alǵan jobalardy keiinge qaldyrýǵa týra keldi.
Búkil Nikolaev óńiriniń turǵyndary qolyna qarý alyp, basqynshylarǵa toitarys berýde. Orys okkýpantaryn tolyq talqandap, úilerine tyrqyratyp qýǵanǵa deiin tynym tappaimyz. Basty maqsatymyz – jeńiske jetý», – deidi Kim.
Ázirlegen, Aijan Qalieva
