Bul týraly búgin arnaiy brifing barysynda Almaty qalasy ákiminiń birinshi orynbasary Saparbek Tuiaqbaev habarlady.
Atalǵan portal tek shahar turǵyndaryna ruqsat berýdi ǵana emes, sonymen qatar qalanyń politsiia qyzmetkerleriniń de jumysyn jeńildetedi. S.Tuiaqbaevtyń aitýynsha, portaldy qurý kásiporyndardy kezeń-kezeńimen iske qosý qajettiliginen jáne soǵan bailanysty koronavirýsty odan ary taratpaý úshin qaladaǵy kólik qozǵalysy kezinde qatań baqylaýdy qamtamasyz etý úshin týyndaǵan.
Osyǵan deiin qalalyq shtabtyń sheshimimen karantin kezinde Almatyda óz qyzmetterin júzege asyrýǵa bolatyn ekonomika sektorlary anyqtalǵan (belgilengen) bolatyn. Bul – qalanyń tirshilik áreketin qamtamasyz etýge qajetti salalar, olardyń ishinde saýda (azyq-túlik dúkenderi jáne dárihanalar), densaýlyq saqtaý, kólik jáne logistika, kommýnaldyq qyzmetter, memlekettik basqarý jáne quqyq qorǵaý organdary, ishinara azyq-túlik ónerkásibi, qurylys, EDB (ekinshi deńgeili bankter) (20-30%), kommýnikatsiia jáne bailanys salalary bar.
"Alaida, osy tizimdi zertteý barysynda biz keibir kásipkerlerdiń bul múmkindikti teris maqsatta paidalanyp, ruqsat berilgen tulǵalardyń tizimine ózderiniń qyzmetterine esh qatysy joq azamattardy tirkep qoiǵanyn anyqtadyq", – dep atap ótti qala ákiminiń orynbasary.
"Sol úshin osy jumystyń barynsha ashyqtyǵyn (aiqyndyǵyn) qamtamyz etýde jáne adam faktorynyń áserin boldyrmaý úshin jańa portaldy jasap shyǵardyq. Portal arqyly kásiporyndar tek ruqsat etilgen salalar boiynsha ótinish bere alady. Jumys isteýine ruqsat etilmegen salalar boiynsha ótinishterdi portal qabyldamaidy. Odan bólek, atalǵan kásiporynda jumys isteitin qyzmetkerler sanynan joǵary mólsherde ótinishter qabyldanbaidy. Árbir kompaniiadaǵy jumysshylar sany týraly málimetter bizdiń memlekettik organdarda bar. Sondyqtan mysalǵa alatyn bolsaq, eger kásiporynda resmi túrde 50 adam jumys isteitin bolsa, portal 50-den astam adam kórsetilgen tizimdi qabyldamaidy. Ótinish berer kezde óziniń ESQ rastaý qajet bolǵannan keiin kompaniianyń birinshi basshylarynyń derbes jaýapkershiligi qarastyrylǵan".
"Bul portaldy jasaý kezinde basty mindetimiz qala kóshelerinde adam sanyn barynsha azaitý bolatyn", – dedi Saparbek Tuiaqbaev.
"Jalpy álemde koronavirýstyń saldary osyndai bolady dep eshkim kútken joq, sharalardy barynsha az ýaqyttyń ishinde qabyldaýymyzǵa týra keldi. Karantin men koronavirýs saldarynyń tez aiaqtalmaitynyn bári jaqsy biledi, qala ekonomikasyn kezeń-kezeńimen iske qosatyn bolamyz, odan arǵysyn ýaqyt kórsetedi. Sol úshin bizge bailanys jasaýdy jáne qaladaǵy qozǵalysty azaitý úshin osyndai portal qajet boldy. Kásiporyn jumysshylary men avtokólik quraldarynyń tizimi portal iske qosylǵan sátten bastap eki kún ishinde – 16 sáýir saǵat 00.00-ge deiin jasalady. Sol ýaqytqa deiin osyǵan deiin berilgen ruqsattardyń qazirgi málimetter bazasynyń sheńberinde kúshi bolady", – dep atap ótti S.Tuiaqbaev.
Almaty qalasy Kásipkerler palatasynyń direktory Nariman Ábilshaiyqov naqtylaǵandai, ESQ engizý bireýden artyq adamǵa tizimge ótinish berýde qajet bolady. Al máselen, úi janyndaǵy dúkender úshin mańyzdy jait - tek bir adamnyń málimetterin engizgen jaǵdaida ESQ bekitýdiń qajeti joq.
"Qalada júrip-turý úshin ruqsaty bar-joǵyn bilý úshin JSN engiziledi, al eger ol jeke kásipker bolsa, IBN engizedi. Baǵdarlama algoritmder negizinde jaldamaly qyzmetkerlerge qalada júrýge bolatyn-bolmaitynyn ózi anyqtaidy. Eger múmkin bolsa, ákimdiktiń tizimine sáikes, kelesidei tereze shyǵady – uiashyqtardy toltyryp bastaý, sonymen birge elektrondy sandyq qoltańba qoiý kerek", – dep habarlady brifing barysynda Almaty qalasy Kásipkerler palatasy óńirlik keńesiniń tóraǵasy Maksim Baryshev
"ESQ eki bólimnen turady. Birinshisi uiashyqtardy toltyrar aldynda qoiylady, odan keiin qyzmetkerlerdiń málimetteri engiziledi, tek JSN, basqa eshteńe engizýdiń qajeti joq. Odan keiin avtokólikke qatysty málimetter engiziledi, iaǵni memlekettik nómir belgisi kerek, avtokóliktiń aty da, markasy da qajet emes. Odan keiin úsh "túrtip qoiý" belgisi turady, qujattardy toltyrý erejelerine sáikes "kelisemin" degen batyrmany basý qajet. Sodan keiin elektrondy sandyq qoltańbanyń ekinshi bóligin salyp, "Kelisemin" degen batyrmany basý kerek. Osydan keiin barlyq qalyptasqan baza shtabqa túsedi jáne odan ary qaraýǵa jiberiledi".
Maksim Baryshevtiń sózine qaraǵanda, onlain-platforma bir ýaqytta 30 myńdai paidalanýshynyń jumysyn atqara alady, aldaǵy ýaqytta birden 100 myń adamdy testileý qarastyrylyp otyr.
Qorytyndylai kele, Saparbek Tuiaqbaev jalǵan aqparat berilgen jaǵdaida kásiporyndardyń alǵashqy basshylary jekelei jaýapkershilikke, tipti qylmystyq jaýapkershilikke deiin tartylýy múmkin ekendigin eske saldy.
