Tarıhtan belgili ata-babalarymyz Naýryz merekesin on kún boıy toılap, ony «Naýryznama» dep ataǵan. Osy oraıda Naýryz meıramyna tán salt-dástúrler de qalyptasqan. Onyń ishinde eń mańyzdysy – jańarýǵa, tazalyqqa bet burý. Naýryz meıramynyń máni tek tabıǵattyń jańarýy ǵana emes, sonymen qatar adamdardyń ómirin, ortasyn tazartýǵa degen umtylysy.

Jańarý kúni adamdar úı-jaıyn, aýlalaryn qoqystan tazartyp, bulaq kózderin ashady, kógaldandyrý jumystaryn júrgizedi. Bul – Naýryzdyń basty dástúri, tabıǵat pen adamnyń úılesimdiligin bildiredi.

Búgin Jetisý ýnıversıtetiniń ujymy men stýdentteri Naýryznama aıasynda senbilikke shyǵyp, qorshaǵan ortany tazalaýǵa úles qosty.

– Qorshaǵan ortany taza ustaý, onyń ekologıalyq jaǵdaıyn jaqsartý – árbir adamnyń paryzy. Biz senbilikke shyǵý arqyly tabıǵat aldyndaǵy jaýapkershiligimizdi sezinip, tazalyqty óz aınalamyzdan bastadyq. Naýryznama aıasynda ótkizilgen osy ıgi sharalar arqyly jastardyń boıynda ekomádenıetti qalyptastyrýǵa tyrystyq, – dedi ýnıversıtettiń rektory Ermek Bóribaev.

Senbilikke shyqqan stýdentter bilim ordasynyń aınalasyn qystan qalǵan qoqystardan tazartyp, Jańarý kúnine úles qosty.

– Bul senbilik men úshin tek ekologıalyq shara ǵana emes, rýhanı jańarý kúni boldy. Qorshaǵan ortany taza ustaý, ony kútý – tek tabıǵattyń ǵana emes, ózimizdiń de ómirimizdiń ajyramas bóligi ekeni anyq. Biz jastar retinde osyndaı sharalarǵa qatysa otyryp, óz jaýapkershiligimizdi sezinip, taza ári ádemi álemde ómir súrýge degen umtylysty arttyryp otyrmyz. Osyndaı bastamalar elimizdiń jas urpaǵyna ekologıalyq mádenıetti qalyptastyrýda úlken mańyzǵa ıe dep sanaımyn, – dedi «Týrzım» mamandyǵynyń 2-shi kýrs stýdenti Beısenbaı Máýlen.

Jalpy, bul shara tek ekologıalyq tazalyqty qamtamasyz etý ǵana emes, jastardyń tabıǵatqa degen jaýapkershilik pen súıispenshiligin arttyrýǵa múmkindik berdi. Senbilik arqyly qorshaǵan ortaǵa degen kózqaras ózgerip, árbir adamnyń bul álemde óz ornyn tabýǵa degen qushtarlyǵy oıanady. Aldaǵy ýaqytta osyndaı bastamalar men is-sharalar elimizde úlken nátıje berip, jastar arasynda ekologıalyq mádenıetti qalyptastyrýǵa septigin tıgizetini anyq.

Jetisýda Ulttyq kıimder kúnine oraı etnodefıle, kórmeler, otbasylyq konkýrstar, beınechellendj ótkizildi.