Jambyl oblysynyń Sarykemer aýylynda halyq qarajatyna salynǵan jańa kóppáterli úılerdiń sapasyna turǵyndar narazy. Bıyl aqpan aıynda aýylda 120 páterli eki úı paıdalanýǵa berilgen. Alaıda bir jyldyń ishinde úılerde aqaýlar paıda bolǵan, dep habarlaıdy Dalanews.kz “Jetinshi arnaǵa” silteme jasap.

Jańa úılerdiń qabyrǵalarynda jaryqtar paıda bolyp, árleý jumystary syrǵyp túsip jatyr. Ortalyq jylý júıesi turaqsyz jumys isteıdi. Páterler sýyq. Turǵyndar máselelerdiń negizgi sebebi úılerdiń qysta salynyp, tolyq qurǵatylmaýynda dep sanaıdy.

Sonymen qatar kóppáterli úılerge ortalyq kanalızasıa salynbaǵan. Onyń ornyna ornatylǵan septıkter únemi tolyp, jaǵymsyz ıis shyǵarady.

Ákimdik ókilderi turǵyndarǵa barlyq kemshilik merdiger kompanıa tarapynan kepildik boıynsha túzetilýin aıtty.

“Aýdandyq kanalızasıany júrgizý úshin jobalyq-smetalyq qujattama ázirlenip jatyr. Eger ol bıyl aıaqtalsa, qarjylandyrý kelesi jyly júrgizilip, úıler ortalyq jelige qosylady. Al qazirgi ýaqytta septıkterdi tazalaý jumystary júrgizilip jatyr”, – dedi aýdandyq turǵyn úı-kommýnaldyq sharýashylyq bóliminiń basshysy Dúrenbek Madıshov.

Turǵyndar men bılik arasynda týyndaǵan jaǵdaı turǵyn úılerdi salýdaǵy tehnıkalyq qadaǵalaýdyń mańyzdylyǵyn taǵy bir ret kórsetip otyr.