Ishki ister vitse-ministri Sanjar Ádilov eldegi aýyr qylmystyń basym bóligi qandai oryndarda jasalatynyn málimdedi, dep habarlaidy Dalanews.kz.
“Qazaqstanda kisi óltirýdiń jartysy, zorlaý men buzaqylyqtyń úshten biri, sondai-aq tonaý men jol apattarynyń tórtten biri mas adamnyń qatysýymen bolady. Jalpy qylmystardyń altydan biri túngi ýaqytta jasalady. Osyǵan bailanysty 1 048 fakti tirkelgen”, — dedi vitse-ministr.
Ádilovtiń sózinshe, biyl kóńil kóterý oryndaryna shaǵymdanýshylar sany 42 myńnan asqan.
“Jyl basynan beri 1 749 qylmystyq is qozǵaldy. Olardyń qatarynda — 10 kisi óltirý, 579 dene jaraqatyn salý, segiz zorlaý, 26 tonaý jáne 238 buzaqylyq deregi bar. Astanada jaǵdai kúrdeli: 171 oiyn-saýyq ornynda 357 qylmys tirkelgen. Kópshiligi tún ortasynda nemese tań ata jasalǵan. Birneshe nysanda quqyq buzýshylyqtardyń jii qaitalanýy da alańdatyp otyr”, — dedi ol.
Onyń aitýynsha, Almatydaǵy kórsetkish te ońyp turǵan joq. Qalada mundai oryndarǵa qatysty 3 588 shaqyrý túsip, 14-ten asa adam óltirý deregi tirkelgen.
Ádilov túngi ýaqytta alkogoldi shekteý máselesi qaita qaralýy tiis ekenin aita otyryp, jaqynda bolǵan aýyr qylmysqa toqtaldy.
“18 qarashada 16 jastaǵy jasóspirimder jaldamaly páterde ishimdik ishken. Saldarynan 16 jastaǵy qyzdy aiaýsyz zorlap, ajal qushtyrǵan”, — dedi ol.
