Almaty oblysy Ile aýdanyndaǵy 9 jekemenshik balabaqshalardyń quryltaishylary qamaýǵa alyndy. Bir aidyń ishinde 29 jekemenshik balabaqsha jabylyp, memleketke 729,0 mln shyǵyn keltirgeni úshin taǵy da birneshe quryltaishylardyń ústerinen is qozǵalýda, – dep habarlaidy Dalanews.kz.
Bul týraly Qonaev qalasynda ótken tamyz keńesinde Almaty oblysynyń ákimi Marat Sultanǵaziev málim etti.
– Túsindire ketsem, munda jekemenshik balabaqshalar kásipkerlik sýbektilerge tekseris júrgizýge salynǵan moratoriidi paidalanyp, memlekettik tapsyrys negizinde bólingen qarjyny jymqyrǵan.
Osy tusta búgingi Tamyz keńesinde kóterilip otyrǵan – bilim berý júiesine sandyq tehnologiialardy engizý óte oryndy jáne qajetti is. Sandyq tehnologiia kóp jaǵdaida bilim salasyndaǵy jemqorlyq táýekelderin joiýǵa septigin tigizeri sózsiz.
Búgingi kúni tsifrlyq tehnologiialar basqarmasy arqyly atalǵan jaǵdailardyń aldyn alý, jemqorlyqqa tosqaýyl qoiý maqsatynda barlyq balabaqshalarǵa menshik túrine qaramastan «biometriia» avtomattandyrylǵan júiesi engizilýde. Munda ár balanyń balabaqshaǵa kelýi jekelei QR kod arqyly tabelge engizilip, esebi júrip otyrady, – dedi óńir basshysy.
Jekemenshik balalaqshalardaǵy kelesi problema – tárbieshi pedagogtardyń bilimi men biliktiliginiń tómendigi. Qazirgi kezde jalpy respýblika boiynsha jekemenshik balabaqshalarda tárbieshiler men kishi qyzmetkerlerdiń óz isine jaýapkershiliginiń tómendigi, psihologiialyq turaqsyzdyǵy saldarynan balalarǵa qatysty túrli jaǵdailar oryn alýda.
Óńir basshysy jekemenshik balabaqshalarǵa pedagogtardyń bilimi men jaýapkershilikterin kóterý baǵytyndaǵy jumystardy júrgizýdi tapsyrǵanyn aitty.
– Búgingi Tamyz keńesinde oblysymyzdyń bilim salasyndaǵy ózekti problemalar kóterilip, jalpy bilim salasynyń damýymen tanystyńyzdar. Bilim berý óte kúrdeli júie ekenin taǵy da qaitalap aitqym keledi. Saladaǵy problemalar naqty jumystar arqyly sheshimin tabady. Osy tusta pedagogtar quzyrettiliginiń joǵary bolýy asa mańyzdy. Oqýshy da, ata-ana da, memleket te Sizderge bolashaǵyn tapsyryp, zor úmit kútedi. Sondyqtan barshańyzdy ónimdi, nátijeli eńbek etýge shaqyramyn, – dedi.
