Saimasai aýylynda kishkentai bala Vladtyń ólimi boiynsha tergeý bastaldy. Mektepke politsiia kelip, oqýshylardan Vladtyń kúndelik júrgizgeni týraly suraǵan. Balalar shyndyqty aitqanymen, mektep psihology Ardaq olardy qorqytyp, «endi ata-analaryń jaýap beredi», dep aitylǵanyn habarlaidy Dalanews.kz. "NeMolchiKZ" qoryna silteme jasap.
Aýyl turǵyndarynyń sózinshe, adamdarǵa qysym kórsetilip jatyr. Kópshiligi ashyq sóileýden qorqady. Sebebi aýyldy bir áýlet — týystar basqaryp otyr.
Bilik pen týystyq bailanys — qorqynyshtyń sebebi
Aýyldyń ákim orynbasary men jergilikti politsiia qyzmetkeri — erli-zaiyptylar. Politsiianyń aǵasy Orazhan Qaspaqbaev — Talǵar aýdany ákiminiń orynbasary. Bul otbasynyń fermalary men biznesi bar, aýyl adamdary jumystan aiyrylyp qalýdan, balasyn mektepke apara almai qalýdan qorqady.
"NeMolchi" málimeti boiynsha, Vladtyń synyp jetekshisi Madina — osy otbasynyń týysy. Ol tragediiadan eki apta buryn dekretke ketip, jyldar boiy balanyń jaǵdaiyna aralaspaǵan.
Politsiia qyzmetkeri Daýlet Qaspaqbaev Vladtyń úiine jihaz aparyp júrgenin kýágerler baiqaǵan. Muny aýyl adamdary «isti jasyrý amaly» dep sanaidy.
Aýyl turǵyndary ne talap etedi?
Qazir turǵyndar kelesi laýazymdy tulǵalardy jaýapqa tartýdy jáne qyzmetten bosatýdy talap etýde: okrýg ákimi Baqytjan Chýrmakov, mektep direktory Nazgúl Dúisenqyzy Sarymbaeva, psiholog Ardaq, synyp jetekshisi Madina Amanjolova, aýdan ákiminiń orynbasary Dinara Tólebaeva, politsiia qyzmetkeri Daýlet Qaspaqbaev.
NeMolchiKZ qory aýyl turǵyndary Qaspaqbaevtar otbasyn «sur kardinaldar» dep ataitynyn jazǵan.
Olardyń aitýynsha, bul týystyq júie adamdardy táýeldi ári qorǵansyz kúige túsirip otyr.
Másele endi tek bir balanyń taǵdyry emes — ulttyq qaýipsizdik deńgeiindegi áleýmettik dertke ainaldy deidi olar.
Dalanews.kz tilshisi Almaty oblystyq politsiia departamentine habarlasyp, istiń mán- jaiy týraly aqparat aldy. Baspasóz qyzmetiniń habarlaýy boiynsha, atalǵan fakt boiynsha qylmystyq is tirkeldi. Barlyq tergeý áreketteri Almaty oblysy politsiia departamentiniń úilestirýimen júrgizilip, oqiǵanyń barlyq mán-jailaryn jan-jaqty, tolyq jáne obektivti anyqtaýǵa baǵyttalǵan.
Tergeý barysy Almaty oblysy politsiia departamenti basshylyǵynyń erekshe baqylaýynda.
