Depýtattar QazUAÝ ustaz-ǵalymdarymen jáne jastarymen júzdesti
Ýniversietimizge arnaiy kelgen qonaqtardyń arasynda QR Parlament Májilisiniń depýtattary Zaǵipa Balieva, Amangeldi Dáýrenbaev, Baqtiiar Máken syndy elge belgili azamattar boldy. Olar oqý oryn qyzmetkerleri men stýdentterge memlekettik aýqymdy baǵdarlamalar barysyn túsindirip, jastardyń zaman talabyna sai bilim alýy, ǵylymmen ainalysýy jáne áleýmettik máseleler tóńireginde oi bólisti.
Kezdesýge orai ótken jiyndaýniversitet rektory, QR UǴA akademigi Tilektes Espolov qonaqtarǵa oqý ornynyń búgingi jetistikteri men aldaǵy maqsattary týraly baiandap, memleket júktegen mindetterdi iske asyrýǵa bailanysty ázirlengen jumys jospary aiasynda atqarylyp jatqan naqty is-sharalar barysy týraly málimet berdi.
Rektor óz sózinde Parlament depýtattary ýniversitettiń ár bastamasyna, ǵalymdardyń ǵylymi jobalaryna únemi qoldaý bildirip otyratyndyǵyn jetkizdi. Tek biylǵy jyly ýniversitette eki joba boiynsha kólemi 1,9 mlrd. teńgeni quraityn 2 jańa innovatsiialyq ortalyq jáne 2 zerthana ashylady. Bul igilikti is-sharalardyń barlyǵy – ýniversitet jastarynyń ozyq bilim alýyna, elimizdiń kemel keleshegin qalyptastyrýyna baǵyttalýda.
Óz kezeginde sóz alǵan Zaǵipa Iahianqyzy jastardyń ǵylymmen ainalysýyna, olarǵa áleýmettik kómek kórsteýge, jalpy agrarlyq ǵylymdy qoldaýǵa halyq qalaýlylary barynsha oń yqpal jasaitynyn atap ótti.
Májilistegi Agrarlyq komitettiń múshesi, depýtat Amangeldi Dáýrenbaev aýyldy kórkeitýge baǵyttalǵan memlekettik baǵdarlamalardyń áli de jetildirýge qajetti tustary bar ekenine toqtaldy.
Qazaq ulttyq agrarlyq ýniversitetiniń túlegi, memleketshil azamat Baqtiiar Mákenuly óz sózinde joǵary bilim alýdyń qoljetimdiligi men sapasyn arttyryp, stýdent jastardyń jataqhanadaǵy jaǵdaiyn jaqsartý máselesi memlekettiń erekshe nazarynda turǵanyn atap ótip, jastardyń jańa bilim alýyna Qazaqstanda múmkindikterdiń mol ekenin naqty mysaldarmen aityp ótti.
Jiyn barysynda ýniversitettiń oqytýshy-professorlary, bilim alýshy jastary depýtattarǵa ózerin tolǵandyryp júrgen suraqtar qoidy.
Qazirgi kezde oqý ornynyń jetistikterimen qatar, áli de tolyq sheshimin tappai turǵan máseleler de az emes. Ýaqyt jyldam ózgerip, bilim, ǵylym, óndiriske qoiylatyn talaptar kúsheiýde. Agroónerkásiptik keshenge jańa innovatsiialyq tehnologiialar engizilýde. Sondyqtan, báskege qabiletti, jańasha oilaityn, tiimdi sheshimder qabyldai alatyn, innovatsiiaǵa beiim mamandar daiyndaýdyń jańa baǵyttaryn damytý kózdelýde. Otandyq kadrlardy daiarlaý, akademiialyq utqyrlyq aiasyn keńeitý, jańa mamandyqtar ashý, suranysy joǵary mamandyqtarǵa memlekettik tapsyrysty kóbeitý, stýdentterdiń áleýmettik jaǵdaiyn jaqsartý boiynsha áli de túiindi máseleler bar.
Búgingi kúni ýniversiette 90% astam aýyl balalary bilim alady. QazUAÝ stýdenteriniń basqa oqý oryndaryna qaraǵanda jatahqanaǵa muqtajdyqtary kóp. Sondyqtan ýniversitet basshylyǵy biylǵy jyly 450 oryndyq jańa «Stýdentter úiin» salýdy josparlap otyr. Qazirgi kezde onyń qurylysynyń jobalyq-smetalyq qujattary ázirlenip, tiisti organdarǵa usynys retinde jiberildi.
Jiyn barysynda atalǵan máselelerdi tiimdi sheshý joldary talqylanyp, ýniversitet ujymy men bilim alýshy jastardyń usynys-pikirleri tyńdaldy. Ýniversitet ujymy men stýdentterdiń talap-tilekterin eskere otyryp, depýtattar tiisti organdarǵa arnaiy saýal joldaityndyqtaryn aitty.
Kezdesý sońynda qonaqtar ýniversitettiń oqý-ǵylymi infraqurylymyn aralap, oqý ornynyń ǵylymi innovatsiialyq ortalyqtarynda bolyp, jas ǵalymdarmen kezdesti.
Depýtattar,sonymen qatar ýniversitet janyndaǵy «N.Nazarbaev bilim jáne ǵylym ortalyǵy» jumysymen tanysyp, bul ortalyqtyń tereń máni men mazmuny jastardy tárbieleýge zor yqpal jasaitynyn atap ótti.
QazUAÝ Baspasóz qyzmeti,
Sýretterdi túsirgen M.Botabekov,
