Jiynda IT-mamandar aqyldy óńirde qalany qurý baǵytyndaǵy innovatsiialyq ideialaryn qosyp, Túrkistannyń keleshegin talqylady. Aldymen jiynǵa qatysýshylar Túrkistan qalasyndaǵy jańa Aqyldy qala turǵyn úi keshenderiniń kirpishin qalaý rásimine qatysty. Onda tsifrlandyrý boiynsha «Platonus» IT-kompaniiasynyń ókili Oljas Turǵambekuly aqyldy qalany qurý men basqarýdyń mańyzdylyǵyna toqtalyp, óziniń alǵan áserimen bólisti.
Odan keiin shara «Smart Turkistan» forýmymen jalǵasty. Kezdesýde tsifrlandyrý boiynsha Túrkistan oblysynyń damý tujyrymdamasynyń tanystyrylymy ótti. Sonymen birge, halyqqa qyzmet kórsetýde memlekettik-jeke seriktestik úlgisi retinde «Vendor Management Office» (VMO) arqyly jumys isteýdiń ashyqtyǵyn engizý jobasy kórsetildi.
Basqosýda Túrkistan oblysy ákiminiń keńesshisi Ulan Tájibaev forýmnyń Túrkistandy damytý úshin mańyzy zor ekenin jetkizdi.
– Biz esep berý úshin tehnologiialar qurmaimyz. Bizdiń mindet – Túrkistan oblysynyń turǵyndarynyń ómirin jaqsartý. Mine, osy memlekettik basqarýda adamǵa baǵdarlanǵan tásil qaǵidasy mańyzdy, – dedi Ulan Qalmuhanuly.
Sondai-aq, forým barysynda spikerler densaýlyq saqtaý, bilim berý, áleýmettik baǵyt, kólik jáne qaýipsizdik, mádeniet, din jáne týrizm, memlekettik basqarý, TÚKSh, aýyl sharýashylyǵy, aqparattyq tehnologiialar men telebailanystar boiynsha óz ideialaryn ortaǵa salyp, usynystaryn bildirdi.
Túrkistan oblysy ákiminiń baspasóz qyzmeti
