"Shyǵys Qazaqstan Elbasy úshin erekshe óńir. Bir kezderi Nursultan Nazarbaev bul óńirdi Qazaqstannyń injý-marjany dep ataǵan edi. Shyǵystaǵy kóptegen igi jobalar Elbasymen esimimen bailanysty. Shyǵys Qazaqstan – Nazarbaevtyń reformalary men jarqyn jobalary, zamanaýi ideialarynyń simvoly ispettes", – deidi Ahmetov.
Ahmetov osy oraida ótken kúnderdi eske alyp, táýelsizdiktiń eleń-alańyndaǵy aýmaly-tókpeli kezeńge toqtalypty.
"Nazarbaevpen 30 jyl boiy úzeńgi qaǵysyp, birge istedim. Osy jyldardy oi eleginen ótkizgende talai taǵdyrly kezeńnen ótkenimizge kýá bolamyn.
Ásirese toqyraý jyldary bilikke de, halyqqa da úlken synaq boldy. Naryqtyq ekonomikanyń zańdylyqtaryn jatyrqai qabyldaǵan jurtqa óz kózqarasyńdy tańý, izińnen júrýge úndeý ońaiǵa soqqan joq.
Shyny kerek jańa zamannyń talaptaryna bastapqyda biz de boi úirete almai, úreimen qaradyq. Mine, sol tustary Elbasy memlekettik qyzmette endi-endi oń-solyn tani bastaǵan bizderdi Almatyǵa shaqyryp, eldi daǵdarystan shyǵarýǵa qatysty sheshimderin ortaǵa salatyn.
Apta saiyn Ońtústik astanada bas qosyp, keshe ǵana egemendik alǵan balań eldiń ári qaraiǵy taǵdyryn aiqyndaityn joba-jospar jasalatyn.
Ol tustaǵy Parlament adýyndy, qyzýqandy edi. Memlekettiń irgesin qalaýǵa kóshken Elbasy táýelsizdiktiń eleń-alańynda túrli kedergimen betpe-bet keldi. Parlamentpen til tabysý, áriptesip jumys isteý ońaiǵa soqqan joq. Ekonomikany qoia turyp, shekarany aiqyndaý, ulttyq valiýtany engizý, Ata zańdy qabyldaý sekildi jaýapty jumystyń ózi tóbe edi.
Biz, myna biz naryqtyq ekonomikanyń bazalyq bilimin Nazarbaevtan úirendik. Nazarbaev naryq zamanynyń zańdylyqtaryn sabyrmen, salqynqandylyqpen qabyldap, elge kerektisin elep-ekshedi.
...
Áli esimde 99 jyly Nazarbaev bastaǵan delegatsiia Qytaiǵa arnaiy is-saparmen bardyq. Kún tártibinde Qytaimen aradaǵy shekarany bekitý máselesi turdy. Jer ýaiymy birinshi kezektegi másele. Ol tusta men shekarany zańdastyrýǵa qatysty komissiiaǵa jetekshilik etetinmin.
Jasyrary joq, uzaqqa sozylǵan qiyn da kúrdeli kelissóz júrdi. Mine, sol kezde Nazarbaevtyń tulǵalyq qasietin tolyq deńgeide baǵalai aldym.
Bul kelissózderdiń aqyr sońy eki tarapqa da tiimdi kelisimmen aiaqtaldy. Álbette, qazir aitýǵa ońai.
Shekaraǵa qatysty aqyrǵy sheshim qabyldanatyn sheshýshi sátte Qytai basshysy: "Bizdiń tarap Shekarany bekitý týraly kelisimshartqa qol qoiady. Bul birinshi kezekte Nazarbaevqa degen yqylas-iltipatymyzdyń belgisi" dep málimdedi.
Munyń bárine sol kezdesýge qatysqan myna men kýámin. Asa mańyzdy strategiialyq máseleni Nazarbaevtyń qairatkerlik qabiletiniń arqasynda asqyndyrmai, ýshyqtyrmai sheship qaittyq.
Qazaqstan KSRO shekpeninen shyqqan elderdiń arasynda alǵashqy bolyp delimitatsiia týraly tarihi kelisimshartqa qol qoidy.
Aita bersek mundai mysal kóp.
Endi ǵana egemendik alǵan eldiń eńsesin kóterýge baǵyttalatyn zań qabyldaý da qiynnyń-qiyny edi.
95 jyly Parlament tarap, Elbasy óz ýkazymen memlekettiń naryqtyq ekonomikaǵa ótýine jol ashqan 100-ge tarta mańyzdy sheshim qabyldady.
Toq eterin aitqanda, Tuńǵysh Prezident jaýapkershiliktiń adamy. Qiyndyqtan qoryqpaityn, aýyrtpalyqty eńsere biletin qabiletiniń arqasynda Qazaqstandai memlekettiń qabyrǵasyn qalady.
Elbasynyń búkil ǵumyry táýelsiz Qazaqstannyń tarihymen tyǵyz bailanysty. Táýelsizdik Elbasymen esimimen úndes.
Sol jyldary qabyldanǵan árbir sheshim Nazarbaevtyń atymen bailanysty.
