"Qazaqtelekom" ulttyq baılanys operatory aksıalarynyń baǵasy 15 qańtarda Qazaqstan qor bırjasyndaǵy (KASE) saýda-sattyq qorytyndysy boıynsha 7,1%-ǵa ósip, 47,64 myń teńge boldy. Bul - atalǵan aksıa saýdasy tarıhyndaǵy alǵashqy rekord. Bir kún buryn ǵana ulttyq operator "Mobaıl Telkom-Servısti" (Tele2/Altel brendterimen jumys isteıdi) satý boıynsha mámileni aıaqtaǵan, dep jazady Dalanews.kz.
Freedom broker sarapshylary birinshi bolyp ústine ájeptáýir qun qosqan baǵaly qaǵazǵa ınvestorlar nazaryn aýdartyp, ony satyp alýǵa keńes bergen. Kelesi kúni, 16 qańtarda "Qazaqtelekom" aksıalary 0,4%-ǵa arzandady. Qazir bul aksıa 47,45 myń teńgeden saýdalanýda.
Ulttyq baılanys operatorynyń aksıalary baǵasynyń ósýi esebinen KASE ındeksi aldyńǵy saýda kúnimen salystyrǵanda 0,2-ǵa, 5772,26 tarmaqqa deıin ósti. Salystyrmaly túrde alsaq, "QazMunaıGaz" (-1,3% - ǵa) jáne Kaspi.kz (-2,2 %). aksıalary azdap arzandady. Sondaı-aq, "Qazatomónerkásipten" (aksıalardyń quny ózgergen joq) basqa ındekstelgen barlyq basqa kompanıalardyń baǵaly qaǵazdarynyń quny ósti.
Freedom Broker orta merzimdi perspektıvada Bank SentrKredıt pen Kcell-den basqa barlyq ındekstelgen aksıalardy satyp alýǵa keńes beredi. Al bank qaǵazdaryn, ázirge ustaı turýǵa, kerisinshe uıaly baılanys operatorynikin satý usynylady.
Kúni keshe, 14 qańtarda "Qazaqtelekom" Pih Communication LLC enshisine saı "Mobaıl Telekom-Servıs" JSHS Jarǵylyq kapıtalyndaǵy qatysý úlesiniń 100%-yn satý jónindegi mámileni túıindedi. Osylaısha Tele2/Altel brendterimen jumys isteıtin MTS mobıldi operatory qatarlyq kompanıaǵa satyldy. 2024 jyldyń maýsym aıynda SDIAÓM basshysy Jaslan Mádıev mámile somasy 1 mlrd dollar bolatynyn shamalady (keıinirek bul somanyń 1,1 mlrd dollar ekeni naqtylandy). Sondaı-aq sarapshylar "Qazaqtelekomǵa" tıesili Kcell-di de satady dep boljaǵan. Alaıda,keshe, 15 qańtarda osy sıpattaǵy saýalǵa "Qazaqtelekom" "Kcell-degi úlesin satpaý kerek degen ustanymda ekenderin jetkizdi.
1 qazandaǵy jaǵdaı boıynsha, "Qazaqtelekomnyń" iri aksıonerleri "Samuryq-Qazyna" qory (71,32%) jáne Jusan Bank (8,1%) bolyp tabylady. Qańtar-qyrkúıek aılarynyń qorytyndysy boıynsha kompanıanyń taza paıdasy 40,5%-ǵa, 53,1 mlrd teńgege deıin qysqardy
