Elimizde AI-92 markaly janar-jaǵarmaidyń quny aqpan aiynyń sońyna qarai 4 teńgege qymbattaidy. Biraq sarapshylar qymbattaý munymen toqtamaitynyn, óitkeni baǵa endi ǵana erkine jiberilgenin eske salady, dep habarlaidy Dalanews.kz.
"Janar-jaǵarmai men dizel otynynyń baǵasynan memlekettik retteý alynǵannan keiin, 1 aqpannan bastap kóterme jetkizýshiler baǵany ósirdi. Olardyń ishinde otyn naryǵynyń 80 paiyzyn qamtýshy KC Energy Group jáne QazMunaiGaz kompaniialary da bar. Bul aqpan aiyndaǵy janar-jaǵarmai kólemin bólshek saýdadaǵylardyń kóterme baǵada qymbat satyp alyp jatqanyn bildiredi. Dizel otyny men AI-92 benzininiń kóterme baǵasy orta eseppen 1 litri 4 teńgege ósti. Demek, aqpan aiynyń sońyna qarai, burynǵy baǵamen satyp alynǵan qor kólemine bailanysty, janar-jaǵarmaidyń bólshek saýdadaǵy baǵasy da 4 teńgege qymbattaidy",delingen Qazaqstannyń munai ónimderi qaýymdastyǵy túsiniktemesinde.
Bul rette, qosylǵan 4 teńgeniń 80%-y, iaǵni 3 teńgesi aktsiz túrinde memlekettik biýdjetke aýdarylatyny da naqtylanady.
Sarapshylar baǵa sonymen birqalypty bolyp qalmaitynyn, onyń alda taǵy ósetinin boljaidy. Óitkeni baǵa erkine jiberilgen.
Al Tengrinews.kz elimizdiń birqatar óńirinde janar-jaǵarmai men avtogaz baǵasy qymbattap úlgergenin habarlaidy.
Elordada keibir janar-jaǵarmai quiý beketterinde AI-95 markaly benzin 265 teńgeden 268 teńgege deiin qymbattady. Al AI-92 markaly benzin 205 teńgeden 207 teńgege deiin qymbattady. Qymbattaý 2-3 teńgeni quraidy.
Almatyda tek buryn bir litri shamamen 270 teńge bolǵan AI-95 markaly benzin 280 teńgeden satylýda. Qymbatshylyq - 10 teńge.
Qaraǵandyda da bul kúnderi benzin baǵasy 2-3 teńgege ósken: AI-92 205 teńgeden 207 teńgege deiin, al AI-95-tiń baǵasy 263 teńgege jetti. Qaraǵandydaǵy janar-jaǵarmai quiý stantsiialarynyń kópshiligi, ázirge eski baǵalardy ustap tur.
Taldyqorǵandaǵy keibir janar-jaǵarmai quiý beketterinde benzinniń baǵasy burynǵy qalypynda tur. Biraq jekelegen JMQS-da AI-92 markaly eń tanymal benzinniń bir litri 2-3 teńgege qymbattady: 205 teńgeden 207-208 teńgege.
Buǵan deiin saitymyzda "Memlekettik retteý alynyp, janar-jaǵarmai men dizel otynynyń baǵalary erkine jiberildi" degen maqala jariialanǵan bolatyn. Sondai-aq qańtar aiynda Energetika ministri Almas Sátqaliev janar-jaǵarmai baǵasy aqpannan bastap qymbattaitynyn,bul taýar túri jyl sońyna deiin shamalylap ústeme baǵa qosyp otyratynyn aitqan edi.
