Saiasatker Ýalihan Qaisarov eks-prezident Nursultan Nazarbaev el ishindegi saiasi yqpalynan tolyq aiyryldy dep esepteidi. Onyń pikirinshe, jańa saiasi qurylym prezident bastamalaryn qoldap, qazirgi biliktiń baǵytyn ilgeriletýge qyzmet etedi, dep habarlaidy dalanews.kz.
Qaisarovtyń aitýynsha, qazirgi jaǵdaida burynǵy saiasi júieniń tiregi sanalǵan partiialar álsiregen. Ol resmi derek boiynsha «Amanat» partiiasynda júzdegen myń múshe bar ekenin, alaida olardyń arasynan ashyq qarsy pikir aitqandar baiqalmaǵanyn atap ótti.
"Toqaev óz kúshin kórsetý kerek boldy. Áitpese, ainaldyrǵan eki-aq edi ǵoi qalǵany. Demek, jumysyn aiaqtap ketýge múmkindik berýge bolatyn edi. Biraq Nazarbaev pen onyń jaqtastaryna soqqy jasaý úshin osylai jasap otyr. Ádeii eski "Nur Otanǵa" óziniń ornyn kórsetip otyr. Iaǵni, senderdiń qoldaryńnan túk te kelmeidi, senderdiń "kókeleriń" joq. Bizdiń aitqanǵa kónesińder dep. Sondyqtan buny ádeii halyqqa kórsetý, Nazarbaev pen jaqtastaryna kórsetý dep qabyldaý kerek", – dedi Ýalihan Qaisarov.
Saiasatkerdiń paiymynsha, buǵan deiin bilikke jaqyn bolǵan birqatar adamdardyń aldaǵy ýaqytta saiasi bolashaǵy bulyńǵyr bolýy múmkin. Onyń aitýynsha, jańa saiasi kezeńde eski kadrlarǵa degen senim azaiǵan.
Qaisarov burynǵy partiialyq júiege qatysy bar keibir saiasatkerlerge de qatysty boljam aitty. Onyń sózinshe, Azat Perýashevtiń tóraǵalyqtan ketýi de osyndai saiasi ózgeristermen bailanysty bolýy yqtimal.
"Perýashev endi qashady Qazaqstannan. Óitkeni sońynan túsýi múmkin. Oǵan jemqorlyqqa bailanysty, Nazarbaevtyń júiesimen tyǵyz bailanysynyń bolýyna bailanysty ári kóp aqparat biledi. Ol úlken kásiporyndardyń partiiasyn basqardy. Kóp tetikterdi bilýi múmkin. Máselen, qarjylandyrý máselesin. Sondyqtan ol álgi jaǵymsyz kýáger retinde, menińshe, qashyp ketýi múmkin", – dedi saiasatker.
Qaisarovtyń pikirinshe, jańa quramǵa burynǵydai tek daiyn mátindi oqyp beretin adamdar emes, naqty oi aita alatyn, kásibi deńgeii joǵary tulǵalar kelýi kerek.
Ol sońǵy jyldary parlamentte depýtattardyń kópshiligi óz oiyn erkin jetkizbei, aldyn ala daiyndalǵan mátindi oqýmen shektelgenin synady. Saiasatkerdiń aitýynsha, bul tek bir partiiaǵa ǵana emes, jalpy saiasi júiege tán qubylys bolǵan.
"Sońǵy 20 jyldy alaiyqshy, qai depýtat parlamentte qaǵazdan oqymai oiyn aitty. Ondai depýtat joq. Tolyq qaǵazdy oqidy. Ol áý basta bastalǵan nárse ǵoi. Partiiaǵa qaramaidy. Aqjol ma, OSDP ma depýtatqa kelip, qaǵazdy qolyna ustatady. Sosyn oqytady. Mine, osyny oqisyń, deidi ózińshe bolyp. Ol óz ishinen shyqqandai qylyp oqidy", – dedi Ýalihan Qaisarov.
