Ǵylym jáne joǵary bilim ministri Saiasat Nurbek kórnekti ǵalym, fizika-matematika ǵylymdarynyń doktory, professor Qairat Qamaluly Qadyrjanovtyń dúnieden ótýine bailanysty kóńil aitty, dep habarlaidy dalanews.kz.
Ministr marqumnyń otbasy men týǵan-týystaryna, áriptesteri men shákirtterine, sondai-aq barsha ǵylymi qaýymǵa qaiǵyra kóńil aityp, Qairat Qadyrjanovtyń Qazaqstan ǵylymy men iadrolyq tehnologiialar salasyna ólsheýsiz úles qosqanyn atap ótti.
Saiasat Nurbektiń aitýynsha, Qairat Qamaluly iadrolyq fizika jáne radiatsiialyq materialtaný salasynyń asa kórnekti ókili, táýelsiz Qazaqstandaǵy iadrolyq ǵylymnyń negizin qalaýshylardyń biri bolǵan. Ol sanaly ǵumyryn ǵylymǵa arnap, otandyq ǵylymi mekteptiń qalyptasýyna, ulttyq kadrlar daiarlaýǵa jáne halyqaralyq ǵylymi yntymaqtastyqty damytýǵa zor eńbek sińirdi.
Qairat Qadyrjanov jiyrma jylǵa jýyq ýaqyt boiy Iadrolyq fizika institýty men Qazaqstan Respýblikasynyń Ulttyq iadrolyq ortalyǵyna basshylyq jasap, elimizdiń iadrolyq ǵylymyn jańa deńgeige kóterýge atsalysty. Onyń jetekshiligimen júzege asqan jobalar burynǵy Semei synaq poligony aýmaǵyn ońaltýǵa, óńirdiń ekologiialyq jaǵdaiyn jaqsartýǵa jáne radiatsiialyq qaýipsizdikti nyǵaitýǵa yqpal etti.
Ministr sondai-aq ǵalymnyń Iadrolyq fizika institýtynyń Astanadaǵy filialyn qurýǵa tikelei uiytqy bolǵanyn atap ótti. Onyń bastamasymen L.N. Gýmilev atyndaǵy Eýraziia ulttyq ýniversiteti, Iadrolyq fizika institýty jáne Dýbna qalasyndaǵy Birikken iadrolyq zertteýler institýty arasynda úshjaqty yntymaqtastyq ornap, «Iadrolyq fizika» mamandyǵy boiynsha qos diplomdy bilim berý baǵdarlamasy iske qosylǵan.
Saiasat Nurbek jýyrda Ǵylym qyzmetkerleri kúni qarsańynda Qairat Qamalulyna Memleket basshysynyń atynan ǵylym salasyndaǵy joǵary memlekettik marapat – «Qazaqstannyń eńbek sińirgen ǵylym jáne tehnika qairatkeri» qurmetti ataǵy tabystalǵanyn da eske saldy.
"Qairat Qamalulynyń jarqyn beinesi, ǵylymǵa adaldyǵy, parasat-paiymy men elge sińirgen ólsheýsiz eńbegi árdaiym halyq jadynda saqtalady. Onyń ónegeli joly keiingi býyn ǵalymdarǵa úlgi bolyp, esimi Qazaqstan ǵylymynyń tarihynda máńgilik oryn alady", – dep jazdy ministr.
Sóz sońynda Saiasat Nurbek marqumnyń jatqan jeri jaily, topyraǵy torqa, imany salamat bolýyn tilep, artynda qalǵan aǵaiyn-týysy men jaqyndaryna sabyr tiledi.
