ەلىمىزدە اي-92 ماركالى جانار-جاعارمايدىڭ قۇنى اقپان ايىنىڭ سوڭىنا قاراي 4 تەڭگەگە قىمباتتايدى. ءبىراق ساراپشىلار قىمباتتاۋ مۇنىمەن توقتامايتىنىن، ويتكەنى باعا ەندى عانا ەركىنە جىبەرىلگەنىن ەسكە سالادى، دەپ حابارلايدى Dalanews.kz.

"جانار-جاعارماي مەن ديزەل وتىنىنىڭ باعاسىنان مەملەكەتتىك رەتتەۋ الىنعاننان كەيىن، 1 اقپاننان باستاپ كوتەرمە جەتكىزۋشىلەر باعانى ءوسىردى. ولاردىڭ ىشىندە وتىن نارىعىنىڭ 80 پايىزىن قامتۋشى KC Energy Group جانە قازمۇنايگاز كومپانيالارى دا بار. بۇل اقپان ايىنداعى جانار-جاعارماي كولەمىن بولشەك ساۋداداعىلاردىڭ كوتەرمە باعادا قىمبات ساتىپ الىپ جاتقانىن بىلدىرەدى. ديزەل وتىنى مەن اي-92 بەنزينىنىڭ كوتەرمە باعاسى ورتا ەسەپپەن 1 ءليترى 4 تەڭگەگە ءوستى. دەمەك، اقپان ايىنىڭ سوڭىنا قاراي، بۇرىنعى باعامەن ساتىپ الىنعان قور كولەمىنە بايلانىستى، جانار-جاعارمايدىڭ بولشەك ساۋداداعى باعاسى دا 4 تەڭگەگە قىمباتتايدى"،دەلىنگەن قازاقستاننىڭ مۇناي ونىمدەرى قاۋىمداستىعى تۇسىنىكتەمەسىندە.

بۇل رەتتە، قوسىلعان 4 تەڭگەنىڭ 80%-ى، ياعني 3 تەڭگەسى اكسيز تۇرىندە مەملەكەتتىك بيۋدجەتكە اۋدارىلاتىنى دا ناقتىلانادى.  

ساراپشىلار باعا سونىمەن ءبىرقالىپتى بولىپ قالمايتىنىن، ونىڭ الدا تاعى وسەتىنىن بولجايدى. ويتكەنى باعا ەركىنە جىبەرىلگەن.

ال Tengrinews.kz ەلىمىزدىڭ ءبىرقاتار وڭىرىندە جانار-جاعارماي مەن اۆتوگاز باعاسى قىمباتتاپ ۇلگەرگەنىن حابارلايدى.

ەلوردادا كەيبىر جانار-جاعارماي قۇيۋ بەكەتتەرىندە اي-95 ماركالى بەنزين 265 تەڭگەدەن 268 تەڭگەگە دەيىن قىمباتتادى. ال اي-92 ماركالى بەنزين 205 تەڭگەدەن 207 تەڭگەگە دەيىن قىمباتتادى. قىمباتتاۋ 2-3 تەڭگەنى قۇرايدى.

الماتىدا تەك  بۇرىن ءبىر ءليترى شامامەن 270 تەڭگە بولعان اي-95 ماركالى بەنزين 280 تەڭگەدەن ساتىلۋدا. قىمباتشىلىق - 10 تەڭگە.

قاراعاندىدا دا بۇل كۇندەرى بەنزين باعاسى 2-3 تەڭگەگە وسكەن: اي-92 205 تەڭگەدەن 207 تەڭگەگە دەيىن، ال اي-95ء-تىڭ باعاسى 263 تەڭگەگە جەتتى. قاراعاندىداعى جانار-جاعارماي قۇيۋ ستانسيالارىنىڭ كوپشىلىگى، ازىرگە ەسكى باعالاردى ۇستاپ تۇر.

تالدىقورعانداعى كەيبىر جانار-جاعارماي قۇيۋ بەكەتتەرىندە بەنزيننىڭ باعاسى بۇرىنعى قالىپىندا تۇر. ءبىراق جەكەلەگەن جمقس-دا اي-92 ماركالى ەڭ تانىمال بەنزيننىڭ ءبىر ءليترى 2-3 تەڭگەگە قىمباتتادى: 205 تەڭگەدەن 207-208 تەڭگەگە. 

بۇعان دەيىن سايتىمىزدا "مەملەكەتتىك رەتتەۋ الىنىپ، جانار-جاعارماي مەن ديزەل وتىنىنىڭ باعالارى ەركىنە جىبەرىلدى" دەگەن ماقالا جاريالانعان بولاتىن. سونداي-اق قاڭتار ايىندا ەنەرگەتيكا ءمينيسترى الماس ساتقالييەۆ جانار-جاعارماي باعاسى اقپاننان باستاپ قىمباتتايتىنىن،بۇل تاۋار ءتۇرى جىل سوڭىنا دەيىن شامالىلاپ ۇستەمە باعا قوسىپ وتىراتىنىن ايتقان ەدى.