Premer-ministrdiń orynbasary – ulttyq ekonomika ministri Serik Jumanǵarin jýrnalistermen kezdesýde qazaqstandyq buqaralyq aqparat quraldarynyń jumysyna kóńili tolmaitynyn aitty, dep habarlaidy dalanews.kz.
Ministr óz málimdemesin Qazaqstanda jyl saiyn 28 maýsymda atap ótiletin Buqaralyq aqparat quraldary qyzmetkerleri kúni qarsańynda jasady.
Ministr ne dedi?
Serik Jumanǵarinniń aitýynsha, BAQ onyń aitqan sózderin tolyq ári burmalamai jetkizbeidi. Sondyqtan ol aldymen óz ustanymyn áleýmettik jelidegi Facebook paraqshasynda jariialap, sodan keiin ǵana jýrnalisterdiń suraqtaryna jaýap berýdi jón kóretinin aitty.
«Maǵan jalaqy tólenetin jumysty atqaryp júrmin. Sondyqtan men aitqan aqparattyń burmalanbai jetkenine múddelimin. Sol sebepti óz ustanymymdy aldymen Facebook-te jariialaimyn. Keiin pikirlerdi jinap, suraqtarǵa jaýap beremin», – dedi ministr.
Sondai-aq ol keibir redaktsiialardyń óz sózderin jariialaý tásiline kóńili tolmaitynyn jetkizdi.
«Shynyn aitsam, men sizderdiń men jetkizgen aqparatty qalai jariialaityndaryńyzǵa qanaǵattanbaimyn», – dedi Jumanǵarin.
Ministrdiń narazylyǵyna ne sebep boldy?
Jýrnalister ministrden BAQ-tyń «piary» degende ózine yńǵaily suraqtarǵa keiinirek, jazbasha jaýap berýdi meńzep otyrǵanyn surady.
Alaida Jumanǵarin mundai tujyrymmen kelispeitinin aitty.
«Men olai degen joqpyn. Aitqanym – men aqparatty tolyq jetkizemin, al sizder sonyń ishinen ózderińizge qyzyqty bóligin ǵana alyp shyǵasyzdar. Aqparatty tolyq jetkizbeisizder. Maǵan dál osyndai jumys unamaidy», – dedi ol.
Máseleniń máni
Aita keteiik, ministrdiń jýrnalister jumysyna qatysty syni pikiri Buqaralyq aqparat quraldary qyzmetkerleri kúnine sanaýly kún qalǵanda aityldy.
Serik Jumanǵarin sońǵy ýaqytta úkimettegi eń kóp talqylanatyn tulǵalardyń biri sanalady. Bul kóbine salyq reformasyna bailanysty.
Buǵan deiin ol jańa Salyq kodeksi kúshine engennen keiin shaǵyn jáne orta biznes jappai jabylady degen pikirlerge jaýap berip, mundai teris stsenariige negiz joq ekenin málimdegen bolatyn. Sonymen qatar ministrdiń salyq reformasynyń alǵashqy nátijeleri týraly aitqan málimdemesin Májilis depýtaty Azat Perýashev synǵa alǵan edi.
Eske salsaq, 2024 jyly Serik Jumanǵarin aýyl sharýashylyǵy ministri Aidarbek Saparovty jýrnalisterge qurmetsizdik tanytqany úshin synǵa alǵan bolatyn. Keiin osyǵan uqsas taǵy bir jaǵdaiǵa pikir bildirgen vitse-premer áriptesiniń áreketinen agressiia baiqamaǵanyn aitqanymen, buǵan deiin oǵan «bulai istemegen durys» ekenin eskertkenin jetkizgen.
