Memleket basshysy Qasym-Jomart Toqaevtyń tóraǵalyǵymen 2025 jylǵy 28 qańtarda Qazaqstan Respýblikasy Úkimetiniń keńeitilgen otyrysy ótedi, dep habarlaidy Dalanews.kz.
Otyrys barysynda elimizdiń byltyrǵy áleýmettik-ekonomikalyq damýynyń qorytyndylary shyǵarylyp, Úkimettiń aldaǵy kezeńge arnalǵan negizgi mindetteri aiqyndalady.
Sonymen qatar, premer-ministr Oljas Bektenov, Ulttyq bank tóraǵasy Timýr Súleimenov jáne birqatar óńirdiń ákimderi baiandama jasaidy.
Eske salaiyq,buǵan deiin saiasattanýshy Qazbek Maigeldinov Úkimet otyrysynda kóterilýi tiis negizgi máselelerge toqtalǵan edi.
Halyqtyń ál-aýqaty
Qazbek Maigeldinovtiń pikirinshe, ótken jyly infliatsiianyń joǵary bolýy azamattardyń naqty tabysynyń azaiýyna áser etti.
“Osyǵan bailanysty Memleket basshysy halyqtyń turmysyn jaqsartýǵa baǵyttalǵan jańa áleýmettik qoldaý sharalaryn jariialaýy múmkin. Bul eldiń ishki turaqtylyǵy men turǵyndardyń jaǵdaiyn jaqsartýda mańyzdy ról atqarady”, — deidi saiasattanýshy.
Maigeldinovtiń aitýynsha, munaiǵa táýeldilikti azaitý maqsatynda ár aimaqta ónerkásiptik damý máselesin sheshý mańyzdy. Sonymen birge eksporttyq áleýetti arttyrý ekonomikanyń turaqtylyǵyn qamtamasyz etýde sheshýshi ról atqarady.
“Joǵaryda aitylǵandai, infliatsiia ári biýdjet tapshylyǵynan ekonomikamyzdyń osal tustary jetip artylady. Sondyqtan elimizdiń ekonomikasyn ártaraptandyrý óte mańyzdy. Ony jai ǵana sózben aityp qana qoimai, is júzinde sheshimin izdeýimiz mańyzdy. Mysaly, munaiǵa táýeldiligimizdi azaitý úshin ár aimaqta ónerkásip máselesin qolǵa alý qajet. Sodan soń eksporttyq áleýetti arttyrý máselesi kún tártibinde mańyzdy bolýy kerek. Bunyń bári tutas 17 aimaqty qamtyǵany jón. Sebebi bul ekonomikamyzdyń turaqtylyǵyna tikelei áser etedi”, — dep atap ótti ol.
Infraqurylymdyq jáne energetikalyq damý
Onyń sózinshe, energetika, logistika jáne tsifrlandyrý salalary boiynsha naqty jobalar negizge alynýy qajet.
“Bul jerde naqty jobalar, naqty tapsyrmalar jáne naqty oryndaýshylar qajet. Óitkeni jańa jumys oryndarynyń ashylýy, ónerkásipterde jańa ónimderdiń paida bolýy el ekonomikasyna oń áserin tigizeri sózsiz. Infliatsiianyń saldarynan turǵyndardyń satyp alý qabileti tómendegendikten, minimaldy jalaqyny, zeinetaqyny jáne áleýmettik járdemaqylardy ulǵaitý máselesi kún tártibine engizilýi tiis. Sondai-aq, azyq-túlik ónimderiniń qoljetimdiligin qamtamasyz etý úshin aýyl-aimaqtarda saýda infraqurylymyn damytý qajet”, — deidi ol.
Salyq saiasaty jáne kásipkerlik
Saiasattanýshy shaǵyn jáne orta biznestiń ekonomikalyq ósimniń negizgi tetigi ekenin eske saldy. Ol qosymsha qun salyǵyn arttyrýdyń ornyna, kerisinshe, salyqtyq jáne nesielik jeńildikterdi qarastyryp, kásipkerlikti júrgizýdegi biýrokratiialyq kedergilerdi azaitý qajet ekenin usynady.
“Ekonomikamyzdyń basty tetigi shaǵyn jáne orta biznes ekenin umytpaýymyz qajet. Osy turǵydan biz qazirgi qoǵamda qatty talqylanyp jatqan qosymsha qun salyǵyn 12%-dan 20%-ǵa ósirý emes, kerisinshe salyq jáne nesie jeńildigi, jalpy myna biznesti ashý jáne júrgizýdegi protsessedýralardy jeńildetý, biýrokratiialyq tejegishterdi alyp tastaý máselesi qaralýy kerek. Eger kez kelgen kásip bankrotqa jabyla beretin bolsa, ol ekonomikalyq ósim ákelmeidi”, — deidi saiasattanýshy.
Tarif saiasaty
Maigeldinov kommýnaldyq qyzmetterdiń baǵasyn qaita qaraý jáne ony tómendetý mańyzdy ekenin de alǵa tartty.
“Kommýnaldyq baǵalar ósip jatyr. Onyń barlyǵy kez kelgen azamattyń qaltasyna aýyr tietini anyq. Erteńgi kúni bul da áleýmettiń narazylyqtyń sebebi bolýy múmkin”, — dep qosty ol.
Ekonomikany damytýdyń uzaq merzimdi perspektivalaryna toqtalǵan Qazbek Maigeldinov Jasyl energetika men energetikalyq táýelsizdikti arttyrýǵa arnalǵan investitsiialyq jobalardyń mańyzdylyǵyn atap ótti.
“Shikizattyq emes sektorlardy damytý jáne aimaqtar arasyndaǵy teńsizdikti joiý basty nazarda bolýy tiis”, — deidi ol.
