Arnaiy asqa Bolathan Taijannyń ózi irgesin qalasqan «Jas tulpar» uiymynyń músheleri men Bolathan Taijanmen birge qyzmet atqarǵan Qazaq eliniń diplomattary, saiasatkerler, jýrnalister qatysty. Atap aitar bolsaq, «Jas tulpar» uiymynyń negizin qalaǵan Aimuqan Taýjanov, saiasatker Jasaral Qýanyshálin, «Jas Alash» gazetiniń bas redaktory Rysbek Sársenbai, aqyn Temirbek Medetbekov, jýrnalist Ermurat Bapi siiaqty almatylyqtarmen birge arnaiy Mańǵystaýdan Jánibek Qojyq, Astanadan saiasatker Erlan Karin jáne Rýza Beisenbektegi alystan at terletip kelip, qoǵam qairatkeriniń ómiri men ónegesin sóz etti.
30 minýttyq derekti filmde qoǵam qairatkeri Bolathan Taijan men uly Muhtar Taijannyń kúreskerlik joly kórsetilgen. Filmniń tusaýkeserinde rejisseri Qasym Amanjol bul filmniń tek Taijandar áýeletindegi ákeniń amanaty ǵana emes, búkil qazaqtyń áke amanaty, ǵasyrlar boiy kele jatqan kúreskerlik joldaǵy babalar amanaty ekenin jetkizdi. Árine, Amanjoldyń Qasymy aitqandai, bul derekti film qazaqtyń qannan taraǵan ór rýhty jas urpaqqa kórsete, babalar amanatyn jetkize bilýge ónege men úlgi bolatynyna kúmánimiz joq.
Dóńgelek ústel barysynda saiasatker, jýrnalist Ámirjan Qosanov pen saiasattanýshy Rasul Jumaly baiandamalaryn oqydy. Ámirjan Qosanov baiandamasynda Bolathan Taijannyń kúreskerlik jolyn aita kelip, qazirgi kúni ekiniń biri «memleket jáne qoǵam qairatkeri» degen ataqqa ie ekenin, memleketke, qoǵamǵa eshqandai paidasy timese de memleket jáne qoǵam qairatkeri atanyp júrgenderdiń kóptigin aityp, ózi úshin bul ataqtan da joǵary turatyn tulǵalar bar ekenin, Bolathan Taijandy qazaqtyń qairatkeri deý kerek ekenin atap ótti. Ultshyldyq týraly aita kelip, Bolathan Taijandy qazaqtyń bar máselelerin kótere bilgen ultshyl ekenin jetkizdi. Ekinshi baiandamashy Rasul Jumaly diplomattyq ómirine toqtalyp, Bolathan Taijan basqarǵan elshilikte qazaq tilin bilmeitin adamǵa oryn joqtyǵyn aitty.
Ámirjan Qosanovtyń baiandamasy aldaǵy ýaqytta gazetter men internet basylymdarynda jaryq kóretinin eskerte keteiin.
Taǵy bir qyzyq jaǵdai, Aisulý apamyzdyń aitýynsha, sonsha joǵary laýazymdy qyzmette júrip, talai qazaqty baspanaly etse de Bolathan Taijannyń otbasy 8 jyl boiy kommýnaldyq páterde turyp kelipti. Bolathan atamyzǵa salsa, odan da uzaq ýaqyt tura bermek eken. Aisulý apamyz: «Men áiel zatymyn ǵoi, arasynda ózimiz páter alsaq degen oiymdy aityp turdym. Ol kisi keiinge qaldyra berdi. Aqyry sońynda 8 naýryz kúni merekelik múmkinshiligimizdi paidalanyp, ótinish jazyp, sol kezdegi ministrdiń birinshi orynbasaryna kirdik. Ótinishti oqyp tańǵalǵan ministr: «Bóke, bul ras pa?» – dep tańǵala suraq qoidy. Solai páterli bolǵanbyz», – dedi. Shynymen de qarapaiymdylyqtyń úlgisi deýge bolarlyq is.
Dóńgelek ústel barysynda sóz alǵan Serikbolsyn Ábdildin aqsaqal Bolathan Taijannyń Táýelsizdikten burynǵy jáne keiingi eńbekterine toqtala kelip, Bolathan Taijannyń qylyshynan qan tamyp turǵan keńes úkimetiniń kezinde-aq ultshylyq kózqarastaǵy oilaryn aitý men isteýden qoryqpai, óz oiyn ashyq bildirip júrgen saýsaqpen sanap alarlyq ultshyldardyń biri dedi. Al aqyn Sofy Smataev Bolathan Taijanǵa stýdent kezinde Máskeýde qazaqtyń áigili Muhtar Áýezovi kezdesip, Alashtyń amanatyn tapsyryp ketkenin aitty.
Alashtyń amanatyn arqalaǵan Bolathan Taijannyń amanaty, «Áke amanaty» – endi bizdiń moinymyzda. Derekti filmniń sońynda qairatker atamyz «Qazaqstannyń tolyqqandy qazaq sipatty, qazaq tulǵaly memleket bolǵanyn kóre almai ketem be?» dep qorqam degen sózi keltirilipti. Bul da bolsa oryndalmai ketken áke amanaty bolsa kerek. «Jaqsydan shapaǵat» deidi, kúreskerdiń shapaǵaty bárimizge tiip, «Áke amanatynyń» oryndalýyn násip etsin. Amanatqa qiianat jasar urpaq bolýdy Alla saqtasyn dep tileiik!
Turdybek Qurmethan
