Qazaqstanda aldaǵy ýaqytta toilardyń sany kúrt azaiýy múmkin. Óitkeni salyq organdary osy baǵyttaǵy qadaǵalaýdy kúsheitpek. Toihanalar ǵana emes, toi jasaityn azamattardyń ózi de tekserilmek. Sebebi toiǵa jumsalatyn aqsha adam tabysynan birneshe ese kóp ekeni, eshqandai tekserýsiz de aian. Demek,bul arada toiǵa jumsalǵan aqsha deklaratsiiasy talap etýi múmkin, dep habarlaidy Dalanews.kz.
Buǵan deiin Memlekettik kirister komiteti merekelik sharalarmen bailanysty aqsha aýdarymdary baqylaýǵa alynatynyn eskertken bolatyn. Endi másele budan da keń aýqymdy qamtyp, iaǵni tek aqsha aýdarymdary ǵana emes, toiǵa ketken shyǵyndardyń ózi de súzgiden ótýi yqtimal. Muny jýyrda Májilis dálizinde jýrnalister saýalyna jaýap bergen Qarjy vitse-ministri Erjan Birjanov rastaǵan.
"Tekserý tek blogerler men tanymal adamdardy ǵana emes, qarapaiym azamattardy da qamtidy. Eń bastysy – shyqqan shyǵyn resmi tabystaryna sáikes kelmese, birden kúdikke ilinedi", – dep Azattyq Rýhy Birjanovtyń jaýabyn keltiredi.
Jalpy, qadaǵalaý mehanizmi qarapaiym. Eger azamattyń resmi túrde kórsetken tabysy jumsaǵan shyǵyndarynan birneshe ese az bolsa, salyq organdarynda suraq paida bolýy múmkin. Ázirge, qandai somanyń "kúdik týdyratyny" nemese tekseristiń qanshalyqty qatań bolatyny belgisiz. Biraq bir nárse anyq: budan bylai sán-saltanatpen ótetin úilený toilary, mereitoilar jáne basqa da aýqymdy sharalar tek qonaqtardyń ǵana emes, memlekettik tekserýshilerdiń de nazaryn ózine aýdaratyn bolady.
Buǵan deiin bilik salyqtyq baqylaýdyń kúsheietinin birneshe ret eskertken bolatyn. Máselen, blogerlerdi bir kúnde aiaǵynan tik turǵyzǵany belgili. Sol sekildi endi kezek toi-dýmanǵa kelip jetken sekildi.
Aita ketsek, búgingi tańda Úkimet pen Ulttyq Banktiń basty problemasy - eki tsifrǵa jaqyndap qalǵan infliatsiiamen kúres. Infliatsiiaǵa qatty yqpal etýshi faktorlardyń biri retinde halyqtyń tym asyra nesie alýy jatady. Osy jaǵynan alǵanda, buǵan shekteýler osy salyq organdary tekserisi turǵysynda paida bolýy múmkin. Taǵy bir jaǵynan, mundai tekseris toiǵa dep nesie alýshylardyń statistikasyn da aiqyndaityn bolady.
