Aita ketsek, qazan aiynyń basynda koronavirýs vaktsinasyna qarsy belsendi Aina Bakeeva men onyń seriktesteri mektepke kirip, janjal shyǵarǵan bolatyn.
"Balalar qaýipsizdigi týraly sóz etkende elordanyń №58 mektebinde bolǵan jaitty aitpai ketýge bolmaidy. Bul mekteptiń ishki erejesiniń buzylýy, bógde kisiniń sabaqtyń ótýine kedergi jasap qaýip tóndirýi. Atalǵan mektep basshylyǵy tiisti shara qoldanyp, jedel áreket etpedi. Jalpy aitqanda balalardyń qaýipsizdigine qaýip tóndirdi. Balalardyń ómiri men qaýipsizdigi únemi mańyzdy", - dedi Ashat Aimaǵambetov ministrliktiń apparat keńesi jiynynda.
Ministrdiń aitýynsha, kez kelgen bilim berý oshaǵy balalardyń qaýipsizdigin tolyq qamtamasyz etýi tiis.
“Qaýipsizdik algorimti, sheshimder, tehnika, beinebaqylaý kamerasy bári de balalardyń qaýipsizdigi jolynda jumys isteýi kerek. Bul jaǵdaidy mekteptegi qaýipsizdikke júrgizilgen tekserý boldy desek bolady. Al eger múldem basqa adamdar bolsa ne bolar edi ? Ol azdai oqiǵa ótkennen keiin araǵa birneshe kún salyp aityla bastady. Mektep basshylyǵy bolǵan jaǵdaiǵa jedel áreket etpeýimen qatar, ony jasyryp baqty. Esh áreket etpedi", - deidi ol.
Osy oqiǵadan keiin bilim jáne ǵylym ministri Ashat Aimaǵambetov qarasha aiynyń ekinshi jartysynda elimizdegi mektepterde respýblikalyq tekseris júrgiziletinin málimdedi.
"Biz osyndai jaǵdailar úshin kúzet qoiýǵa arnaiy tapsyrma berdik. Bolǵan jaǵdai máseleniń tolyq sheshilmegenin kórsetti. Sondyqtan qarashanyń ekinshi jartysynda qosymsha respýblikalyq tekseris júrgiziledi. Qajetti ýaqyt berildi, qarajat bólindi, problemany sheshýge múmkindik bar. Taǵy da qaitalaimyn, eń mańyzdy másele – balalardyń qaýipsizdigi", - dedi ministr.
Aita keteri, áleýmettik jelide taraǵan videoda birneshe áiel mektep oqýshylaryna bilim mekemesinde vaktsina salynyp jatqanyn aitqan, rolik ata-analar chattaryn dúrliktirdi.
Elordanyń bilim basqarmasy 58-shi mekteptiń direktory oqiǵa kezinde ornynda bolmaǵanyn habarlady. Ol qalalyq ákimdiktegi jinalysqa ketken. Oqiǵadan keiin mektep ákimshiligi Aina Bakeeva men mektepke basa-kóktep kirgen basqa da áielderdiń ústinen shaǵym túsirdi. Aitýlarynsha, olar kúzetshi men meditsina qyzmetkerin uryp-soǵyp, jalǵan aqparat taratqan.
