Prezidentke Qazaqstannyń aqshany jymqyrýǵa qarsy qarjylyq áreket jónindegi jumys tobynyń (FATF) halyqaralyq standarttaryna sáikestigin ózara baǵalaýdyń ekinshi raýndyna daiyndyǵy týraly baiandaldy. Agenttik tóraǵasy ulttyq táýekelderdi baǵalaý nátijeleri jáne FATF-tyń birqatar negizgi usynymdaryn ulttyq zańnamaǵa engizýge múmkindik beretin zań jobasyn parlamentte qaraý barysy týraly aitty.
Memleket basshysy qylmystyq jolmen alynǵan kiristerdi zańdastyrýǵa jáne terrorizmdi qarjylandyrýǵa qarsy júrgizilip jatqan jumystardy joǵary baǵalady. Atap aitqanda, qabyldanǵan sharalar aqsha jymqyrýǵa qarsy Basel AML indeksi boiynsha álemdik reitingte Qazaqstannyń pozitsiiasyn jaqsartýǵa múmkindik beredi.
Sondai-aq prezidentke elimizdegi kóleńkeli ekonomikamen kúrestiń jai-kúii týraly aqparat berildi. 490 sotqa deiingi tergep-tekserý jumystary bastalǵan, onyń ishinde 28-i uiymdasqan qylmystyq top qurý, jalǵan shot-faktýralar bergen tulǵalarǵa jáne qylmystyq qolma-qol aqshaǵa ainaldyrý faktileri boiynsha.
Budan bólek, Janat Elimanov Qasym-Jomart Toqaevqa qarjylyq piramidalardy joiý týraly buiryǵynyń oryndalý barysy týraly habarlady.
Jyl basynan beri qarjy agenttigi 5 qarjy piramidasynyń jolyn kesip, zardap shekkenderge 2,3 mlrd teńge qaitaryp bergen.
Memleket basshysy quqyq qorǵaý jáne basqa da múddeli organdarmen birlese otyryp, bul baǵyttaǵy jumysty jandandyrýdy tapsyrdy. Toqaev azamattardyń qarjylyq piramidalarǵa aldanbaýy úshin keshendi sharalar qabyldaý qajettigin málimdedi.
