پرەزيدەنتكە قازاقستاننىڭ اقشانى جىمقىرۋعا قارسى قارجىلىق ارەكەت جونىندەگى جۇمىس توبىنىڭ (فاتف) حالىقارالىق ستاندارتتارىنا سايكەستىگىن ءوزارا باعالاۋدىڭ ەكىنشى راۋندىنا دايىندىعى تۋرالى باياندالدى. اگەنتتىك ءتوراعاسى ۇلتتىق تاۋەكەلدەردى باعالاۋ ناتيجەلەرى جانە فاتف-تىڭ ءبىرقاتار نەگىزگى ۇسىنىمدارىن ۇلتتىق زاڭناماعا ەنگىزۋگە مۇمكىندىك بەرەتىن زاڭ جوباسىن پارلامەنتتە قاراۋ بارىسى تۋرالى ايتتى.
مەملەكەت باسشىسى قىلمىستىق جولمەن الىنعان كىرىستەردى زاڭداستىرۋعا جانە تەرروريزمدى قارجىلاندىرۋعا قارسى جۇرگىزىلىپ جاتقان جۇمىستاردى جوعارى باعالادى. اتاپ ايتقاندا، قابىلدانعان شارالار اقشا جىمقىرۋعا قارسى Basel AML يندەكسى بويىنشا الەمدىك رەيتينگتە قازاقستاننىڭ پوزيسياسىن جاقسارتۋعا مۇمكىندىك بەرەدى.
سونداي-اق پرەزيدەنتكە ەلىمىزدەگى كولەڭكەلى ەكونوميكامەن كۇرەستىڭ جاي-كۇيى تۋرالى اقپارات بەرىلدى. 490 سوتقا دەيىنگى تەرگەپ-تەكسەرۋ جۇمىستارى باستالعان، ونىڭ ىشىندە 28ء-ى ۇيىمداسقان قىلمىستىق توپ قۇرۋ، جالعان شوت-فاكتۋرالار بەرگەن تۇلعالارعا جانە قىلمىستىق قولما-قول اقشاعا اينالدىرۋ فاكتىلەرى بويىنشا.
بۇدان بولەك، جانات ەليمانوۆ قاسىم-جومارت توقايەۆقا قارجىلىق پيراميدالاردى جويۋ تۋرالى بۇيرىعىنىڭ ورىندالۋ بارىسى تۋرالى حابارلادى.
جىل باسىنان بەرى قارجى اگەنتتىگى 5 قارجى پيراميداسىنىڭ جولىن كەسىپ، زارداپ شەككەندەرگە 2،3 ملرد تەڭگە قايتارىپ بەرگەن.
مەملەكەت باسشىسى قۇقىق قورعاۋ جانە باسقا دا مۇددەلى ورگاندارمەن بىرلەسە وتىرىپ، بۇل باعىتتاعى جۇمىستى جانداندىرۋدى تاپسىردى. توقايەۆ ازاماتتاردىڭ قارجىلىق پيراميدالارعا الدانباۋى ءۇشىن كەشەندى شارالار قابىلداۋ قاجەتتىگىن مالىمدەدى.
