Almaty qalasyndaǵy Ulttyq ulannyń 5574 bóliminde áskerı boryshyn ótep júrgen 19 jastaǵy Almas Shahımovtyń jumbaq ólimine qatysty sot áli jalǵasýda. Eki aı buryn áskerge attanǵan ulynyń qalaı qaza tapqanyn anyqtaý úshin anasy Indıra Týǵanbaeva kúresti toqtatpaıtynyn aıtady, dep habarlaıdy Dalanews.kz kznews.kz saıtyna silteme jasap.
Eki aıdan soń tabytpen oralǵan sarbaz
2003 jyly týǵan Almas Shahımov áskerı qyzmetke 2022 jyldyń kókteminde Aqmola oblysy, Kókshetaý qalalyq Qorǵanys isteri jónindegi departamenti arqyly shaqyrylǵan. Ol Almatydaǵy 5574 áskerı bóliminde boryshyn óteýi tıis edi.
Resmı málimet boıynsha, 2022 jylǵy 10 tamyzda oqý ortalyǵynda dalalyq daıyndyq kezinde qatty jelden shatyr qulap, onyń temir jaqtaýy sarbazdyń basyna soǵylǵan. Áskerı bólimniń habarlamasynda Almastyń áriptesterin qaýipsiz jerge shyǵarýǵa kómektesip júrip jaraqat alǵany, jedel jetkizilgen Qonaev qalalyq aýrýhanasynda kóz jumǵany aıtylǵan. Áskerıler onyń qaza tabýyn “janqıarlyq áreket” dep sıpattady.
Alaıda sot-medısınalyq saraptama qorytyndysy múlde basqa jaǵdaıdy kórsetken - onyń denesindegi jaraqattar kisi qolynan qaza tapqanyn dáleldegen.
"Úsh mınýtta daýylmen adam bulaı jaraqat almaıdy"
Anasynyń aıtýynsha, Almastyń denesinde 26 jaraqat bolǵan, arqasy temekimen kúıdirilgen, úsh jerden pyshaq izderi tabylǵan, qylqyndyrý belgileri de bar.
“Shabyttanyp ketken balam eki aıdan soń tabytta keldi. Muny qalaı daýyldan óldi dep túsindirýge bolady? Bir ret qulaǵan shatyr mundaı iz qaldyrmaıdy. Eshqandaı daýyl bolmaǵan. Ulymdy saǵattap qorlap óltirgen. Bir jarym jyldan keıin qaıta qazyp alǵanda moıyn súıeginiń synǵanyn anyqtadyq. Eksperttiń biri tipti súıekti urlap áketken. Balamnyń kıimderin de joǵaltqan”, – deıdi ol.
Komandırge nebári bir jyl jaza usynylǵan
Ata-anasy sotqa qatyspaı qoıǵan. Sebebi is Qylmystyq kodekstiń 453-baby (qyzmetke salǵyrt qaraý) boıynsha ótip, aıyptalýshy – Shahımovtyń tikeleı komandıri Dáýren Baıyzbekovke eń kóbi 1 jyl jaza qarastyrylyp otyr.
“Biz bul bappen kelispeımiz. Ulymdy uryp óltirip, keıin ‘shatyr qulady’ dep habarlady. Komandırdiń ózi sarbazdar meni daýyl boldy dep qorǵap jatyr deıdi. Bir kýáger bar edi, ol shetelge qashyp ketti. Sonyń tergelýin talap ettim. Tergeý qaıta bastaldy”, – deıdi Indıra Týǵanbaeva.
Túrmedegi “erejesiz jekpe-jekke aparý” nusqasy
Anasynyń aıtýynsha, birneshe adam Almastyń túrmege aparylyp, erejesiz tóbeles kezinde qaza bolýy múmkin ekenin aıtqan.
Ofıserlerdiń qatigezdigi týraly da málimet túskenin jetkizedi.
“Ospanbekov pen Shaıqamalov degen ofıserlerdi qatigez dep aıtty. Birneshe adam olardyń isine shydamaı jumystan ketken. Keıin balammen birge qyzmet etken sarbaz jolyǵyp: ‘Eshqandaı daýyl bolmady, balany túrmege aparyp óltirdi’ dedi. Taǵy bir sarbaz ájeme de sony jazǵan”, – deıdi ol.
Resmı organdarǵa syn
Anasy Bas prokýratýradan da nátıje kórmegenin, dálelderdiń joǵalýyna jol berilgenin aıtady.
“Meniń isimdi úsh ret japqan. Eger shyndyq ashylsa, ofıser, polkovnık, generaldardyń basy ketedi. Sondyqtan jyly jaýyp tastaýǵa tyrysyp otyr dep oılaımyn. Qorǵanys mınıstrligi qabyldamaı qoıdy. Bizdi nesıeńdi jaýyp beremiz dep aldarqatty. Bizge jeńildik emes, aqıqat kerek”, – deıdi ol.
Qorǵanys mınıstriniń jaýaby
Qorǵanys mınıstri Dáýren Qosanov áskerdegi álimjettik baryn joqqa shyǵardy. Tipti jýrnalıserdiń suraǵyna kúlip jaýap berdi.
“Qazir ondaı jaǵdaı joq. Eger zorlyq-zombylyq bolsa, dálel kórsetińizder. Kamera ornatamyz, pres-týr jasaımyz. Ásker - qoǵamnyń bir bóligi, jastar arasynda túsinispeýshilik bolýy múmkin. Biz tártipti qadaǵalap otyrmyz”, – dedi mınıstr.
