Almaty qalasyndaǵy Ulttyq ulannyń 5574 bóliminde áskeri boryshyn ótep júrgen 19 jastaǵy Almas Shahimovtyń jumbaq ólimine qatysty sot áli jalǵasýda. Eki ai buryn áskerge attanǵan ulynyń qalai qaza tapqanyn anyqtaý úshin anasy Indira Týǵanbaeva kúresti toqtatpaitynyn aitady, dep habarlaidy Dalanews.kz kznews.kz saityna silteme jasap.
Eki aidan soń tabytpen oralǵan sarbaz
2003 jyly týǵan Almas Shahimov áskeri qyzmetke 2022 jyldyń kókteminde Aqmola oblysy, Kókshetaý qalalyq Qorǵanys isteri jónindegi departamenti arqyly shaqyrylǵan. Ol Almatydaǵy 5574 áskeri bóliminde boryshyn óteýi tiis edi.
Resmi málimet boiynsha, 2022 jylǵy 10 tamyzda oqý ortalyǵynda dalalyq daiyndyq kezinde qatty jelden shatyr qulap, onyń temir jaqtaýy sarbazdyń basyna soǵylǵan. Áskeri bólimniń habarlamasynda Almastyń áriptesterin qaýipsiz jerge shyǵarýǵa kómektesip júrip jaraqat alǵany, jedel jetkizilgen Qonaev qalalyq aýrýhanasynda kóz jumǵany aitylǵan. Áskeriler onyń qaza tabýyn “janqiiarlyq áreket” dep sipattady.
Alaida sot-meditsinalyq saraptama qorytyndysy múlde basqa jaǵdaidy kórsetken - onyń denesindegi jaraqattar kisi qolynan qaza tapqanyn dáleldegen.
"Úsh minýtta daýylmen adam bulai jaraqat almaidy"
Anasynyń aitýynsha, Almastyń denesinde 26 jaraqat bolǵan, arqasy temekimen kúidirilgen, úsh jerden pyshaq izderi tabylǵan, qylqyndyrý belgileri de bar.
“Shabyttanyp ketken balam eki aidan soń tabytta keldi. Muny qalai daýyldan óldi dep túsindirýge bolady? Bir ret qulaǵan shatyr mundai iz qaldyrmaidy. Eshqandai daýyl bolmaǵan. Ulymdy saǵattap qorlap óltirgen. Bir jarym jyldan keiin qaita qazyp alǵanda moiyn súieginiń synǵanyn anyqtadyq. Eksperttiń biri tipti súiekti urlap áketken. Balamnyń kiimderin de joǵaltqan”, – deidi ol.
Komandirge nebári bir jyl jaza usynylǵan
Ata-anasy sotqa qatyspai qoiǵan. Sebebi is Qylmystyq kodekstiń 453-baby (qyzmetke salǵyrt qaraý) boiynsha ótip, aiyptalýshy – Shahimovtyń tikelei komandiri Dáýren Baiyzbekovke eń kóbi 1 jyl jaza qarastyrylyp otyr.
“Biz bul bappen kelispeimiz. Ulymdy uryp óltirip, keiin ‘shatyr qulady’ dep habarlady. Komandirdiń ózi sarbazdar meni daýyl boldy dep qorǵap jatyr deidi. Bir kýáger bar edi, ol shetelge qashyp ketti. Sonyń tergelýin talap ettim. Tergeý qaita bastaldy”, – deidi Indira Týǵanbaeva.
Túrmedegi “erejesiz jekpe-jekke aparý” nusqasy
Anasynyń aitýynsha, birneshe adam Almastyń túrmege aparylyp, erejesiz tóbeles kezinde qaza bolýy múmkin ekenin aitqan.
Ofitserlerdiń qatigezdigi týraly da málimet túskenin jetkizedi.
“Ospanbekov pen Shaiqamalov degen ofitserlerdi qatigez dep aitty. Birneshe adam olardyń isine shydamai jumystan ketken. Keiin balammen birge qyzmet etken sarbaz jolyǵyp: ‘Eshqandai daýyl bolmady, balany túrmege aparyp óltirdi’ dedi. Taǵy bir sarbaz ájeme de sony jazǵan”, – deidi ol.
Resmi organdarǵa syn
Anasy Bas prokýratýradan da nátije kórmegenin, dálelderdiń joǵalýyna jol berilgenin aitady.
“Meniń isimdi úsh ret japqan. Eger shyndyq ashylsa, ofitser, polkovnik, generaldardyń basy ketedi. Sondyqtan jyly jaýyp tastaýǵa tyrysyp otyr dep oilaimyn. Qorǵanys ministrligi qabyldamai qoidy. Bizdi nesieńdi jaýyp beremiz dep aldarqatty. Bizge jeńildik emes, aqiqat kerek”, – deidi ol.
Qorǵanys ministriniń jaýaby
Qorǵanys ministri Dáýren Qosanov áskerdegi álimjettik baryn joqqa shyǵardy. Tipti jýrnalisterdiń suraǵyna kúlip jaýap berdi.
“Qazir ondai jaǵdai joq. Eger zorlyq-zombylyq bolsa, dálel kórsetińizder. Kamera ornatamyz, press-týr jasaimyz. Ásker - qoǵamnyń bir bóligi, jastar arasynda túsinispeýshilik bolýy múmkin. Biz tártipti qadaǵalap otyrmyz”, – dedi ministr.
