Batys Qazaqstan oblysy ákimdigi Oral qalasynda sý tasqynynan zardap shekken turǵyndarǵa berilgen úılerge qatysty resmı túsinikteme berdi, dep habarlaıdy Dalanews.kz.

“BQO boıynsha ekonomıkalyq tergep-tekserý departamenti júrgizgen taldaý nátıjeleri boıynsha Oral qalasy ákimdigi janyndaǵy komısıanyń jekelegen músheleri tarapynan BQO aýmaǵyndaǵy sý tasqyny saldaryn joıý kezeńinde saıajaı alaptary turǵyndaryna turǵyn úı bólý jáne keltirilgen zalaldy óteý barysynda zańǵa qaıshy áreketter jasalǵany anyqtaldy. Taldaý materıaldary komısıa jumysyn zańnamaǵa sáıkestendirý boıynsha tıisti sharalar qabyldaý maqsatynda oblys ákimine joldandy”, — dedi BQO ákimdiginiń baspasóz qyzmeti.

Ákimdik qazirgi ýaqytta tek sot arqyly máseleniń túpkilikti sheshiletinin jáne zańǵa sáıkes áreket etip jatqanyn jetkizdi.

“Kelip túsken taldaý materıalyn jan-jaqty qarap, zańdy sheshim qabyldaý úshin komısıa quramynda bolǵan eki adamǵa qatysty sotqa talap-aryz berildi. Bul másele boıynsha baǵa berý jáne sheshim shyǵarý sottyń quziretine jatady.

Bul rette, atalǵan jaǵdaıǵa túpkilikti baǵa berýge quzyretti organ — tek qana sot, al faktilerdi burmalap, qoǵamda jalǵan túsinik qalyptastyratyn kez kelgen jarıa málimdemeler sot tóreligine qysym jasaý áreketi retinde qarastyrylýy múmkin”, — dedi olar.

Buǵan deıin

Aıta keteıik, buǵan deıin Oral qalasynyń turǵyny ári muǵalim Aınur Sabyr BQO ákimi Narıman Tóreǵalıulynyń áreketine shaǵymdanyp, Prezıdentke, Úkimetke jáne Parlament depýtattaryna ashyq úndeý joldaǵan edi. Ol bılikten turǵyndarǵa úı berýdegi ádiletsizdikterge nazar aýdarýdy surady.